No.650/2020-2021

Aizawl, the 28th April 2020: Vawiin khan Pu Ramesh Pokriyal Nishank, Union Minister, Ministry of Human Resource Development hovin state hrang hranga Education Minister ten Video Conference hmangin zirna chungchanga thil pawimawhte an sawiho.

He hunah hian School Education Minister Pu Lalchhandama chuan Mizoram School Education Department hnuaia mamawh leh harsatna te a thlen a. Minister chuan nikum December thlaa Hindi zirtirtu 665 lak phalna Mizoramin a hmuh tawh Financial Year thara chhawm nun te, zirlai 10 aia tam awmna zirna inah Hindi zirtirtu dah anih theih nana zirtirtu 208 dil belhna te, SSA hun laia kum 2013-14 chhunga sum la dawn kim loh te, sum awmsa hmanga naupang uniform man te, text book a thlawna sem te, zirtirtu hlawh te pek fel a rawt a. Samagra Shiksha hnuaiah zirtirtu hlawh chu state sorkar hnuaia an tlukpuite ngaihtuahin a hniam ta hle a, chubakah DIET a thawkte nen an hlawh pek dan kalphung a in ang lo hle bawk a ti a. Samagra Shiksha hnuaia thawktute hlawh chu state sorkara an tlukpuite hlawh milin ennawn nise. Chutiang anih loh vek chuan sorkar laipuiin zirtirtute cadre thliarhranna awm lova kaihhruaina a kalpui mek chu state in a kalpui reng thei dawn lo tih te a sawi bawk a ni.

Minister chuan Samagra Shiksha hnuaia zirtirtute thla 3 hlawh sorkar laipuiin a la pek fel loh DIET leh IASE a thawkte tan pe thuai turin a ngen bawk.

He video conference-ah hian Pu Lalchhandama Ralte School Education Minister hi Commissioner & Secretary Pi Esther Lal Ruatkimi, School Education Director Pi Lalrinzuali, SCERT Director Pi Laldawngliani Chawngthu, School Education Addl Director Pu James Lalrinchhana leh Joint Director Pu Lalhmachhuana ten an tawiawm a ni.