No.3367/2021-2022 

Aizawl 11th December 2021: Mizoram Chief Secretary Dr. Renu Sharma chuan vawiin khan Hnahthial a tlawh a, Hnahthial District Bawrhsap Pu R. Lalremsanga hovin KVK Training Hall-ah head of offices te, Hnahthial District VC Association te, NGO hruaitu leh MJA nen inkawm hona hun an hmang a ni.

Pi Jennifer Vanlalhruaii Pachuau, SDC inkawmhona kaihhruaiah Pu R. Lalremsanga District Bawrhsap chuan Hnahthial District dinhmun tlangpui power point presentation hmangin a entir a, hemi hnu hian Dr. Lalrengpuii Ralte, Medical Officer pawhin Hnahthial District Covid-19 dinhmun a entir bawk.

Chief Secretary Dr. Renu Sharma chuan Chief Secretary a nih hmaa Mizorama a awm tawh thu te, tun tum a lo kalnaah Mizoramah hmasawnna nasa tak thleng a hmuh thu sawiin lawmawm a tih thu pawh a sawi a, a bik takin District thar pathum te engtiangin nge sorkarin a kalpui tih hriat a duh avangin Hnahthial pawh rawn tlawh a nih thu te, District Officer te chu ram rawngbawla an hnathawhna kawngah mipuite tan theih tawp chhuah tura chahin harsatna an neih te Bawrhsap office kaltlangin a hnena thlen thin tur leh tih theih a neihna zawnah chuan theih tawp chhuahpui a inhuam tih a sawi.

Dr. Renu Sharma chuan Covid-19 in min tibuai nasa em em a, hmasawnna pawh duh angin a kal chak thei lova a pawi hle a ni. Covid-19 vaccine pek kawngah Hnahthial District chu a ti tha pawl tak in nih avangin a lawmawm ka ti hle a, district mipui za za in kumin chhung ngeia Covid-19 vaccine an lak theih nan tan la sauh sauh turin a chah a, officer te, khawtlang hruaitute, kohhran hruaitute leh NGO te pawhin vaccine lak chungchangah mawhphurhna an nei ve a ni tiin Hnahthial District chu District hmasawn tak ni turin duhsakna a hlan a ni.

Chief Secretary hian KVK, Horticulture, Sericulture leh Agriculture Department in an thil/thlai thar an phochhuah te a tlawh bakah Hnahthial District chhunga hmasawnna hna thawh School of Agriculture Science building sak mek te, District Hospital leh Bawrhsap office te a tlawh hnuah Aizawl panin a haw leh nghal a ni.

Attachment

  • Loading attachment...