82/2025-2026

Aizawl dated 8th April 2025: Vawiin chhun khan Chief Secretary’s Video Conference Room, MINECO, Aizawlah nu leh naupang hriselna ngai pawimawh tur a inzirtirna ‘7th Edition of Poshan Pakhwada’ chu Mizoram pum a hman tan turin Pu Khilli Ram Meena, IAS, Chief Sectretary chuan a tlangzarh a. He hun hi Pi Lalzarmawii, IAS, Commissioner & Secretary, Social Welfare, Tribal Affairs, Women & Child Development chuan kaihruaiin Pi Zoramthangi Chhangte, Director, Women & Child Development chuan Poshan Pakhwada 2025 hman dan tur sawi zauna a nei a. Mizoram district hrang hranga District Programme Officer, Child Development Programme Officer leh Integrated Child Development Services-a thawktute, he Video Conference-ah hian an tel a ni.

Mizoram Chief Secretary Pu Khilli Ram Meena chuan nu leh naupang hriselna tihhmasawnna tur a hmalakna ‘Poshan Pakhwada’ chu kum 2018 atangin thupui pawimawh tak tak behchhan a kalpui thin a nih thu sawiin kumin atana thupui hlawm pawimawh tak pali thlan chhuahte pawh a hlawhtlin ngei nan tanrual a tul thu a sawi a. Khawtlang hrisel siamna kawngah nu leh naupangte hriselna enkawl that hi thil pawimawh tak a nih thu a sawi. Chief Secretary chuan Poshan Pakhwada huam chin nu leh naupang tam thei ang berin Anganwadi Centre kaltlanga hmathatna an dawn theih nan ‘Beneficiary Module’ a inziahluh dan inzirtirna video tawi siam chu zau thei ang ber a theh darh a pawimawh thu sawiin nu nau pai leh nau pawm mekte leh naupangin an mamawh ang ei tur tha an hmuh ngei theih nan ‘7th Edition of Poshan Pakhwada’ hun hi tangkai taka hmang turin Video Conference chhimtute chu a chah bawk a ni.

Poshan Pakhwada 2025 thupui te chu; Ni Sangkhat pawimawhna, Beneficiary Module (Mipui vantlangin anmahni hmalakna leh duh thu a Anganwadi Centre-a an inziahluh theihna) thehdarh te, ei tha ei tawk loh avanga naupang hrisel lo enkawl dan te leh Obesity ven kawnga nun dan tha/chin dan tha inzirtir uar te a ni a. April ni 8 atangin ni 25 thleng hian Poshan Pakhwada 2025 pual hian hmun hrang hrangah hun hman tur a ruahman a ni a. Chung zingah chuan Webinar on Community based Management of Acute Malnutrition, Awareness Campaign on ‘No to Single use plastic & 1000 Days window of Opportunity’, Awareness program on ‘Screen Time Reduction’, Poshan Panchayat leh Extempore Speech Competition-te a tel a ni.