4755/2024-2025

Siaha the 21st March 2025: Vawiin chhun dar 12:00 khan Pu Khilli Ram Meena, IAS, Chief Secretary, Mizoram hovin Forest Conference Hall, MADC ah Siaha District-a Head of office te’n thutkhawmna an nei. He hun hi Pu VL Hruaizela Khiangte, Deputy Commissioner, Siaha chuan a kaihruai.

District Bawrhsap Pu VL Hruaizela Khiangte chuan hun chep tak karah Pu Khilli Ram Meena, IAS, Chief Secretary, Mizoram in Siaha district a lo tlawh thei chu lawmawm a tih thu sawiin chibai bukna a nei a ni.

Siaha district-a Head of Office kalkawmte chuan inhmelhriattirna an nei a, an department hnathawh, harsatna an tawh te leh hmalakna hrang hrangte tarlanna an neih bakah Chief Secretary, Mizoram-in zawh belhna a neihte tha takin an chhang.

Pu Khilli Ram Meena, IAS, Chief Secretary chuan kalkhawmte hnenah lawmthu sawiin, Siaha District dinhmun tlangpui endik tura lo kal a nih thu sawiin, Inkalpawhna kawng tha tawk lo chu veiawm a tih thu a tarlan bakah kawng siam hnathawk leh enkawltute chu tan la thar turin a chah a. Hmasawnna chak tak nei turin inkalpawhna tha a pawimawh hle a ni, a ti. Chief Secretary chuan, zirna leh kawng engkimah Siaha District tan hmasawnna tur a tam hle tih a tarlang a, a bik takin pawl hniam (primary education) lamah tan a ngai lehzual a ti. Mizoram hmun dang ngaihtuahin Siaha-ah ruihhlo man a tlem tih thu department lamin an sawi chu lawmawm a tih thu a sawi rualin ruihhlo do kawngah Siaha District chu ramri hrula awm a nih avangin Excise & Narcotics Department, Assam Rifles leh Police-te tangrual sauh sauh turin a fuih bawk. Buh leh thlai tharchhuah a pun theih nan tun aia tan lak a tul thu Chief Secretary chuan sawi langin, Oil palm chin pawh ngaih pawimawhah neih a tha a, chu’ng tharchhuahte phurchhuahna tur kawng tha neih a pawimawh bawk avangin department hrang hrangte lungrual taka thawhhona neih a tul a, district thuneitute pawhin a theih ang angin ngaihvena buaipui turin a chah nghal bawk.

Pu Manny Bhushan Singh, IPS, Superintendent of Police, Siaha chuan Siaha District chhunga Police dinhmun leh duty post awmte sawiin, dan an kenkawh dan leh hmalakna hrang hrang power point presentation hmangin a tarlang a, Pu Thomas Maratha Hlychho, SDC Siaha chuan kawng hrang hranga Siaha district dinhmun Powerpoint Presentation hmangin a tarlang bawk.

Vawiin thutkhawmah hian Siaha District-a Department hotute bakah MADC official-te kokim takin an tel a, Pu VL Hruaizela Khiangte, Deputy Commissioner, Siaha chuan lawmthu sawina neiin hun a khar.

Thutkhawmna neih zawh hnu hian Pu Khilli Ram Meena, IAS, Chief Secretary, Mizoram leh Pu M. Laikaw, Chief Executive Member, MADC chuan inkawmna an nei bawk.