State Chief Ministers Conference on Internal Security nimina New Delhi a neihah Chief Minister Pu Lal Thanhawla chuan agenda note a Mizoram chu state ralmuang tia tarlan a ni chu lawmawm tiin, he dinhmuna ding reng thei turin a sorkar chuan theihpatawp a chhuah reng dawn a ni a ti. Confernece hi Prime Minister Dr.Manmohan Singh leh Home Minister P.Chidambaram ten an hmanpui a ni.

Pu Lal Thanhawla chuan hmarchhak state te awmdan sawiin, khawi state berah emaw buaina awmse thenawm stateah nghawng a neih thuai zel avangin venhimna tha tawk kan mamawh tak zet a ni a ti a. Chhan hrang hrang, awmna kilkhawr avangte, ngaihthah nia inhriatna te, hmasawnna chak tawk loh avangte leh kum 10/20 kalta chhunga mak tak maia mihring lo pung ta vakin mahni hnama chiang lova inhriatna te hian tuna kan dinhmunah hian min awmtir a ni a ti a.India khawmualpui nena kan inpawh tawk lohnate hian he dinhmunah hian min dah nia a hriat thu a sawi bawk a. Chuvangin helai hmuna harsatna kan neihte hi dan leh thupek that tawk lovah puh mai lovin, ngunthluk tak leh zau taka ngaihtuahna hmanga tihfel theih anih a mimal ang pawha a beisei thu Chief Minister chuan a sawi a ni.

State ralmuang tih vanga awm mai mai tur kan nih bik loh thu sawiin, Chief Minister chuan Bangladesh nen ramri, enkawlna mumal awmlo 318 Km a thui leh Myanmar nen 404 Km a thui kan neih avangin Mizoram chu ralthuam tawlhrukna kawngpuiah hel pawl ten an hman thin thu a sawilang a. State ralmuang kan nihna hi thenawm state a hel pawl ten chettlat vel nan an hman hlauh thin avangin kan state policete leh para-military force te an hahin an hnathawhah an fakawm hle thin a ni a ti.

Chief Minister chuan a ngaihpawimawh zualte zingah Border Area Development Programme (BADP) chak zawka kalpui te, Police Reforms te, National Police Mission in rawtna a siam anga Transparent Recruitment Process  hman chungchangte leh Anti Corruption Bureau tihlen mek chu a tih chakna turin Ministry of Home Affairs chu hmala tura a ngenna te a sawilang a.Hengte bakah hian India Reserve Police battalion 5 din tawhah sum la hmuh tur te leh chenna in tur, transport leh ralthuam atan fund release turin cewntral sorkar chu a ngen bawk a. Central sorkar thurawn anga 3rd IR Bn pawh ni 27 Jan 2010 khan Assam ah a battalion puma kaltir an nih tawh thu a sawilang bawk a. Hetih rual hian Chief Minister chuan Mizoram atanga 2nd IR Bn Chhatishgarha an awm chhunga sum an hmuh tur la awm chu Ministry of Home Affairs(MHA) hnenah petlak thuai turin a ngen bawk.

Chief Minsiter chuan Police Commando Company 2 din tura tih, cheng vaibelchhe 3 ve ve senna tur central sorkar ina a rulh leh tura tih chu sum harsatna avangin MHA in release zawk mai se tiin a ngen bawk a ni.