Health Minister Pu Lal Thanzara chuan vawiin khan Mizoram Civil Service Association (MCSA) General Conference vawi 42-na, Beraw Tlang Tourist Complex-a neih chu khuallian niin a hmanpui. 

Minister chuan MCS Officer-te chu Sorkar neitu dik tak an nih avangin kawng engkimah neitu chan chang tura ngaih an nih thu te, midang aia in pe zo leh Sorkar hmakhua ngaia Sorkar tana rinawm tlat tura beisei an nih thu a sawi a. Khawvel a changkan chhoh zel rualin hnathawhna kawnga thiamna leh hriatna kan mamawh te pawh a changkang chho ve zel a, hotute thurawn dik leh tha pe tu tur officer hi sorkarin a mamawh lehzual a ni tiin, chutiang tur chuan officer rinawm nih mai bakah officer rintlak leh innovative ideas nei an nih tel a pawimawh thu a sawi a ni. Khuallian chuan Sorkar kal tha tur chuan administrative structure a fel a ngai a, chutiang tur chuan sorkar pawhin hma a lak chhoh mek thu sawiin, administrative reforms chungchangah te sorkar pawh fin chhuah zel turin conference chhimtute chu a sawm a. All India Service leh Central Service-te leh State Civil Service Officer-te thawhho dan tha zawk leh kalphung fel zawk neih dan te pawh sorkarin a ngaihtuah zel tur thu a sawi bawk. 

Minister Pu Lal Thanzara chuan sorkar hnathawkte chuan an hnathawhna leh nitin nunah  “integrity” vawng nun tlat turin a chah a. Kan hlawh zat leh kan thil neihte, kan fate zirna senso awm ang te leh kan nunphung hrim hrim te hi thenawm khawveng leh thiante chang nilo, mipui mimir pawh hian an thlir thiam ve vek a ni tih hre reng chungin, mahni hlawh leh sorkar hriatpuina a kan lakluh mila nun thiam hi kan zir a hun ta hle a ni, a ti a. MCS Officer-te chuan an awmna theuhah sorkar aiawha thuneihna tawp chelhtu an ni theuh a, chutih rualin an thuneihna chu zahngaihna leh tlawmna nen a inthuamin, hmang sual lo tura invawng tlat turin a chah a ni. 

Vawiin MCSA General Conference-ah hian MCSA President Pu Lalzirmawia Chhangte hnen atangin thusawi ngaihthlak niin, kum 2016-2017 chhunga an member boral ta mi panga (Pu. L. Pachhunga, Pu. Lalfakzuala, Pu Lalhmunsanga Lawtlai, Pu Lallura Sailo, Pu Tapanjit Gupa) sunna hun hman a ni. Member thar MCS 2017 batch-te lawmna hun neih ni bawkin, Pi Ramdinliani, Joint Secy, CSW (Trg) chuan lawmna thu a sawi a. Chawhma hun hi Pu K. Laldingliana, MCSA President chuan kaihruaiin, chawhnu lamah Pu Lalzirmawia Chhangte kaihhruaiin rorel inkhawm neih a ni a. Kum 2017-2019 chhunga an pawl hruaitu turte thlanna neih nghal a ni bawk.