World No Tobacco Day, 2017 pualin vawiin khan Assembly Annexe Conference Hall-ah Chief Minister Pu Lal Thanhawla hovin hun hman a ni a. A ni tak May ni 31 ah Mizoram sawrkar chuan mahni office theuhah he ni pual hian hun an lo hmang tawh a, vawiin chawhnu khan Mizoram Chief Secretary Pu Lalmalsawma kaihhruaiin Mizoram State Tobacco Control Society leh Indian Society on Tobacco & Health (Mizoram Chapter) tangkawpin he ni pual hian seminar an buatsaih a ni.
Chief Minister Pu Lal Thanhawla chuan Mizoramin ram pum huapa ber a kaina thenkhat - cancer natna vei tam ber, HIV/AIDS vei tam ber ram pathum zinga pakhat, ram ti kang tam ber pawl, zuk leh hmuam ti tamna ram a nihnate chu a chhuanawmlohvin a zahthlak a, tan lak a ngai nasa hle, a ti a. Zuk leh hmuama insum lote chu an hrisel lova, damdawia inenkawl nan sum tam tak sen ral a ngai a, hrisel loh chuan hna a thawh hleih theihloh a, heng zawng zawng avang hian zuk leh hmuam hi hmasawnna tithuanawptu a ni, a ti. Chief Minister chuan vaihlo leh a kaihhnawih do pawl te tihah chauh dah lovin vaihlo do hna thawk turin tan tlan a tul takzet a, kohhran leh tlawmngai pawlte pawhin tun aia nasa zawka tan an lak a tul, tih a sawi a. World No Tobacco Day puala seminar buatsaih chhimtute pawhin mahni remchanna apiangah a thatlohzia sawi darh tur te, zirna in leh biak inah inzirtir tam tur leh nu leh pate pawhin an tu leh fate zirtir tam turin a chah a ni.
Chief Minister hian Legal Metrology, Food Civil Supplies & Consumer Affairs Department; Aizawl DC, Pu Kanan Gopinathan leh Mizoram Police Director General of Police hnenah zuk leh hmuam do kawnga an thawhthat avangin chawimawina Award of Appreciation a hlan a ni.
He huna Guest of Honour Mizoram Legislative Assembly Speaker Pu Hiphei pawhin thusawiin vaihlo chu mihring hriselna tichhetu a nih avangin India sawrkar pawhina a khuahkhirhna dan Cigarettes and Other Tobacco Products Act (COTPA) a siam a, he dan hi Mizoram mipuite pawhin kan zawm that a tul a ni, a ti a. Mihring hriselna ti chhetu, hmasawnna tithuanawptu zuk leh hmuam laka fihlim tur leh do turin World No Tobacco Day puala seminar hmangtute a sawm a ni.
ISTH (Mizoram Chapter) President Pi Lal Riliani chuan ‘vaihlo siamchhuaktute avangin ram leh hnam hmasawnna a thuanawp a, chuvangin sawrkar leh mipuite hian hriselna leh hmasawnna kawnga him taka an kal theih nan khawvel huapa vaihloin chhiatna a thlen tur dodal ngam tur a ni’ tih chu an au hla a nih thu a sawi a. Zu leh Drugs ngawl veite chuan thil sual an ti tih inhriain an in thiam lova, sim tumin an bei thin; chutihlaiin mihring nunna tam tak suattu zuk leh hmuam ti te erawh chuan sual khawihah an inngai hauh lo tiin a thathlohzia leh mihring nun a pawh tawi nasatzia hria a heng laka fihlim tur leh do zel turin ISTH (Mizoram Chapter) President chuan Mizo mipuite a sawm a ni.
National Family Health Survey 2015-2016 chhunga neihah Mizoramah mipa 80.4% leh hmeichhia 59.2% te chu vaihlo zu, hmuam emaw eite an ni a. Global Adult Tobacco Survery 2009-2010 ah Mizoram chu India rama vaihlo hmang nasa ber niin vaihloa mipuiin sum an hmanral zat chu ni khatah cheng nuai 60.93, thla khatah cheng nuai 1827.84 vel, kum khat chhungin cheng nuai 21,934.07 zet a tling pha a ni. Civil Hospital-in damlo phai kal tura a refer zat zirchianna April leh May, 2017 inkara neihah damlo refer za zela 66.66 te chu vaihlo khawih thin an ni a, 73.08% te chuan vaihlo avanga natna awm thei an vei a, cancer treatment la mek zingah 83.33% chu vaihlo zu, ei emaw hmuam thinte an ni.
World No Tobacco Day puala hun buatsaihah hian Rajya Sabha MP Pu Ronald Sapa Tlau, Deputy Speaker Pu R.Lalrinawma bakah Parliamentary Secretary, MLA-te leh MLA lo ni tawh thin engemawzat an tel a. Taxation Jt. Commissioner Pu Kailiana Ralte, CID (Crime) SP Pu Lallianmawia leh Mizoram Cancer Care Foundation Vice President Pu C.Zaihmingthanga ten thu an sawi a. ISTH (M) Vice President Dr.B.Thangdailova’n thu sawiin hun hnung a khar a ni.
