Vawiin khan Lawngtlaiah Green Mizoram Day hman a ni a. Chawhma dar 10-ah DC office tualah a hawnna inkhawm buatsaih niin, Lawngtlai District Bawrhsap Dr A. Muthamma IAS chu Khuallian a ni. 

Khuallian chuan thing chu boruak thianghlim hip tur min petu leh nunna hnar pawimawh tak a nih avangin Green Mizoram Day-ah chauh lo pawh thing phun uar a pawimawh thu a sawi a. Khawvel sik leh sa danglam zel leh khaw lum zel veng tur chuan thing phun hi thil pawimawh ber a ni, a ti. Kal khawmte chu thing phuna duh tawk mai lo va, a tam thei ang ber phun nun tum turin a chah bawk. 

Hawnna inkhawm hi Govt Lawngtlai College Principal Pu T.Thangthuama'n a kaihruai a. Deputy Conservator of Forests (Wildlife) Pu PC Lalchhandama'n Lawngtlaia Green Mizoram Day hman tawh dan sawiin, Village Level Fire Prevention Award 2017 dawngtu khua a puang nghal a. Lawmman hi Khuallianin a hlan nghal bawk. 

Village Level Fire Prevention Award 2017 lawmman pakhatna hi M.Kawnpui khuain an dawng a; pahnihna chu Ngengpuikai niin, Thaltlang chu pathumna an ni. 

Hawnna inkhawm neih zawh hian thing tiak phun tur semin, sawrkar department leh tlawmngai pawl hrang hrangte'n Mampui kawnga an thing phunna hmun tur lam an pan nghal a. Vawiin hian thing tiak 350 vel phun a ni. 

Green Mizoram Day hi a tirah chuan Green Aizawl tiin kum 1998 khan Aizawlah hman tan a ni a. Kum 1999 atangin Green Mizoram tih hming chawiin ram pumah hman a ni. Lawngtlai District bikah chuan kum 2000 atang khan hman tan niin, kum tin hman a ni a. Thing tiak 17494 phun tawh zingah 8368 chu nungin, za zelah sawmli pariat (48.70%) nung ang a ni.