Vawiin hian Mizoram Civil Service Association chuan DP & AR buatsaih One Day Workshop for MCS Officers - “Towards inclusive growth and development” chu Pu Lalrinmawia Ralte, Minister of State, Environment & Forest Deptt. in a hmanpui.

Khuallian chuan ram chhung ei leh bar din hmun tha tur chuan sawrkar hnathawk ten mawhphurhna tam tak an neih thu a sawi a. Inclusive growth nei turin sector hrang hrang-ah holistic development kan mamawh thu a sawi bawk.

Sawrkar hnathawk te an vanneih zia leh sawrkar chungah lawm fo turin a chah a. MCS officer te chu elite service an nih ang in, an ngaihtuahna fim leh ril zawk hmang peih tur in a chah.

India 2020 chungchang sawiin, Mizo mipui ten hmasawn kan duh vek a, chuvangin hemi lam hawia hmalak na chu MCS ten an ti thei a ni a ti. Hmasawnna tehfung hrang hrang ti danglam thei tute chu MCS Officer te an ni tiin, awm ze nei tak a hmalak na kan neih chuan vawiin a thupui ‘inclusive growth and development’ kan nei thei ngei ang a ti.

Khuallian hian ram hmasawn nan ngaihtuahna thar kan siam a ngai tak zet a. Look East Policy hnuai a Kaladan Multi Modal Transport Project atanga hmasawnna kan neih tur te lo dawng sawng thiam a, mipui leh ram tana a hlawk thei ang ber a ruahmanna siam thiam turin MCS Officers te a fuih bawk a. Kan theihna chin chinah ruahmanna tha zawk leh rawtna tha zawk te kan nei a nih chuan ram hruaitu te leh sawrkar kan fin chhuah fo a tul thu MCS Officer kalkhawmte chu a chah a ni.

Workshop hi Pu David Lalthantluanga’n kaihruaiin, MCS Officers te chuan Workshop thupui pahnih New Economic Development Policy of Mizoram, Dr C. Vanlalramsanga, IES, Secretary, Planning Deptt paper buatsaih leh Public Private Partnership Pu Vanlalmawia, Joint Secretary, UD & PA Deptt. paper buatsaih chu zir hona leh sawi hona an nei bawk.