Mizoram Civil Services Sports & Cultural Association Annual Sports Meet vawi 31 na chu vawiin chawhnu dar 2:00 khan R. Dengthuama Indoor Stadium, Mualpuiah zawhfel a ni a, kharna inkhawmah hian Pu Chalrosanga Ralte, MLA, Mizoram Tennis Association president ni bawk chu khuallian a ni.

Khuallian chuan, ' Vawi 31 lai mai Inter Departmental sports kan nei thei ta hi a lawmawm a, sawrkar hnathawk te hian in unauna tha te, thawhhona tha te, infiamho thlengin kan mamawh a, hetiang hun kan buatsaih thei reng hi a lawmawm tak meuh a ni. Sawrkar hnathawkte hi Mizoram neitute in ni a, sawrkarna fawng chelhtu tak tak ten kan pawimawhna kan hriat a tul. Rinawmna leh dikna vawng chungin ram tan theih tawp kan chhuah a ngai. Rinawm leh dik taka hna kan thawk a nih phawt chuan he ram hian kawng dik a zawhin ram kan siamtha ngei ang tih ka ring tlat a ni a ti.

Inter Departmental Sports Meet ah hian a pumpuiah Police Department pakhatna an ni a, gold 11, silver 12, bronze 19, a vaiin medal 42 an dawng a. Education Department pahnihna an ni a, gold 9, silver 5 leh bronze 8, a vaiin medal 22 an dawng. Pathumna P&E Department chuan gold 8, silver 2 leh bronze 6, a vaiin medal 16 an dawng ve bawk.

Mizoram Civil Service Sports Meet ah hian sawrkar hnathawk infiammi 1400 vel an tel a, corporate body hrang hrangte nen an vaiin Department 70 vel an tel thei a ni.