No.3237/2021-2022
Aizawl 1st December, 2021 : Vawiin khan Mizoram Cleanliness Competition, 2021 endiktu (Panel of Expert) mi 3, Pu Ralthuama Ralte, Dy. Director, UD&PA, Team Leader, Pu Roneihthanga Ralte, Fin. Secy, Central YMA leh Pi Casy Lalnunsangi, Pollution Control Environment Specialist te chuan Mamit khawpui chhung an endik. Endiktute hi DC Conference Hall, Mamit-ah lo dawngsawngin Dr. Lalrozama, IAS, Chairman Mamit Town Sanitation Task Force/District Bawrhsap hovin Programme hmanho a ni.
He hunah hian Pu C. Sawihlira, DUDO, Mamit chuan Mizoram Cleanliness Competition, 2021 atana Mamit khawpui inbuatsaihna hrang hrang report pein Pu Lallianmawia Tlau chuan Mamit khawpui faina tura hmalakna hrang hrangte a lem nen entirin a tarlang bawk.
He hunah hian Panel of Expert te pawhin an endikna tur point hrang hrang an tarlan bakah faina chu thawklehkhata fai mai ni lovin, kan tu leh fa, chhuan lo la awm lehzel turte rilruah faina kan tuh theih nana hmalak a pawimawh thu an sawi. He hunah hian sawihona hun tha tak hmanho nghal a ni bawk.
Mamit khawpui chhung faina beihpuithlak nan hian DC leh DUDO hmalaknain hnatlang vawi tam tak koh a ni tawh a. DIPRO leh MJA te'n veng hrang hrang, Zirna In leh Sorkar Office hrang hrangte tlawh kualin vawi 2 an endik tawh bakah Khawpui fai inelna atan hian Sub- Divisional Level Road Protection Squad te pawhin Site Inspection an nei thin bawk a ni.
Panel of Expert te hian Mamit khawpui chhung hmun hrang hranga faina kalpui dan endikin an kalkual zui nghal a ni.
Attachment
- Loading attachment...
