No.3236/2021-2022

Aizawl 1st December 2021: New Delhi a cham mek Mizoram Chief Minister Pu Zoramthanga chuan Housing and Urban Affairs leh Petroleum and Natural Gas changtu Union Minister Pu Hardeep Singh Puri chu vawiin khan Parliament Building-a a pisaah a hmu a.  National Security Adviser Pu Ajit Doval nen inkawmna hun an hmang bawk.

Chief Minister chuan Bawngkawn leh Vaivakawna fly-over leh Chaltlanga Bus Terminal siam tur chungchang Union Minister hi a sawi pui a. Heng thil pathum te hi a thuphung (in principle)-in Sawrkar Laipui chuan a lo pawm tawh a. Chumi zawhah a hmunhmate zir chiang a, feasibility report siam tura Sawrkar Laipuiin a hriattir pawh tha taka peihfel leh thehluh (submit) tawh a ni. Vawiin meeting-ah hian Chief Minister Pu Zoramthanga chu Detailed Project Report (DPR) buatsaih nan cheng nuai 61 an rawn pek (release) tur thu hrilhin DPR buatsaih nghal turin thurawn a lo pe a ni. 

Kawng chhawng (Elevated road) chungchang pawh Union Minister nena an meeting-ah hian an sawi dun a. Aizawl tihchangkanna tur Sawrkar Laipui project kal mek - Smart City fund atanga siamrem theih dan kawng a awm a nih chuan he project hnuaia sum hi elevated road siam nan hman an phal thu Chief Minister Pu Zoramthanga hi a hriattir a ni.  

ONGC in Meidum bula  oil leh gas zawn nana lei an verh chhunzawm zelna chungchang pawh Chief Minister hian Union Minister Pu Hardeep Singh Puri sawipui a, ONGC chu a rang thei ang bera lei verh hna chhunzawm tura a lo hriattir tur thu Union Minister hian Chief Minister a hrilh a ni. 

Vawiin vek khan Chief Minister chuan National Security Adviser Pu Ajit Doval pawh a chenna inah a hmu a. State venhimna chungchang leh hmarchhak politics boruak an sawi dun a ni. 

Mizoram Chief Minister Pu Zoramthanga hi Adviser to Chief Minister (Technical) Pu K. Lalsawmvela, Mizoram House Resident Commissioner Pu Amjad Tak leh official dang ten an tawiawm a ni.