3990/2023-2024

Dated Serchhip, the 28th February, 2024: Mizoram Cleanliness Competition 2023 ah Category II – District Headquarters inelnaah Serchhip Town chuan lawmman pakhatna a dawng a. Vawiin khan Serchhip DC Pu David Lalthantluanga hovin DC Conference Hall ah a lawmna hun an hmang.

DC chuan fai inelnaah Serchhip Town pakhatna an ni chu a lawmawm takzet a ni, a ti a. Tehfung hrang hrang zingah khawpui chhung leh a vel faina bik chu he inelna tehfung lian ber a ni a, khawpui chhunga inthiarna hmun hrang hrang te endik niin, bawlhhlawh thliar hran te, bawlhhlawh paih dan te, Zirna In hrang hranga faina leh thianghlimna kalpui dan te leh khawpui cheimawi te thlengin he inelna hian a ngai pawimawh em em a; chutiang inelna hautaka Serchhip Town in pakhatna lawmman a dawng thei chu chhuanawm a tih thu a sawi. Serchhip UD&PA Dept te, VC leh NGO zawng zawngte leh, faina kawnga nasa taka hma la tute chungah DC chuan lawmthu a sawi a. Serchhip khawpui hi faina leh tehfung hrang hrangah nasa takin hma kan sawn a, chutih rual chuan tan lakna tur leh hmachhawp tam tak kan la nei a, tha thlah loa tan kan lak chhunzawm zel a ngai a ni, a ti.

Pu David Lalthantluanga chuan bawlhhlawh tawih thei leh tawih thei lo thliar hran (waste segregation at source) chungchang sawiin Serchhipah kalpui ve thuai a ngai dawn, a ti a. Central Sorkar in a ngaih pawimawh em em Solid Waste Management Centre pawh neih a tul dawn a, Serchhip a UD&PA hmalakna zel tur ah mipui leh sorkar tanrual a ngai hle dawn a ni, a ti. Khawpui chhung bikah/tuihawk luankawr leh a khuhna mumal zawk a siam te hi thil pawimawh tak a ni a, khawtlang hruaitute chu ngaih pawimawh hmasaka neih tura sawmin DC chuan an sum hnar hrang hrang atang ten a siam dan kawng dap zel turin a ngem a. Kawngsir leh kawng dunga bawlhhlawh chhekkhawl na hmun (garbage vulnerable points) te pawh kalsan hret hret a, a nei lo awmchhun khawpui fai tak nih tum turin DC Pu David Lalthantluanga chuan Serchhip khawtlang hruaitute leh mipuite a sawm a ni.

Mizoram Cleanliness Competition hi Category thumah then a ni a. Aizawl leh Lunglei Municipal Council chhunga Ward hrang hrang te hi Category I ah dah an ni a. Category II ah District Headquarters pakuate inelin Serchhip chuan pakhatna lawmman a dawng a; pahnihna hi Khawzawl niin Siaha Town chuan lawmman pathumna a dawng a ni. Category III ah Notified Town Sawmpasarih (17) (district headquarters tiam loh in) te an inel a. Hetah hian Biate Town chu Pakhatna niin pahnihna Phullen, pathumna Ngopa an ni a. Mizoram Cleanliness Competition Lawmmante hi February 16, 2024 khan Minister Pu K Sapdanga’n Aizawlah a sem a ni.

Mizoram Cleanliness Competition hi India ram pum huapa faina inelna Swachh Survekshan 2024 kal lai meka inpuahchahna atana ruahmanna a ni.

Vawiin programme ah hian Serchhip Town huam chhunga Village Council 14 te sawm an ni a, an hnenah hian DC chuan lawmpuina cheng singkhat theuh a hlan a ni.

DUDO Pu Gaston Vanlalhriatpuia chuan Serchhip Town chhunga an hmalakna leh hmachhawp te a sawi fiah a. Serchhip Joint VC Chairman Pu C Vanlalsiamthara chuan fuihna leh lawmpuina thu a sawi a ni.