2959/2024-2025

Siaha the 13th November 2024: Vawiin khan UD&PA hnuaia DAY-NULM District Project Officer (DPO) Pu Vanlalchhuanliana, Siaha SDO (S) ni bawk kaihhruainain a office-ah Mizoram Cleanliness Competition-2024 pualin thutkhawmna buatsaih a ni.

DPO Pu Vanlalchhuanliana chuan Mizoram Cleanliness Competition-2023 ah Siaha District chu Mizoram pumah pathumna dinhmun a lo hauh tawh thu tarlangin ‘pakhatna kan nih ngei theih nan sawrkar leh NGO, Kohhran leh Khawtlang kan tanrual a ngai hle a, inelna a lawmman dawn ngawr ngawr lam nilovin khawpui thianghlim leh hrisel kan neih theih nan theihtawp chhuah tlan a tul takzet’ a ti. Khawpui fai inelnaa tehfung hrang hrangte tarlangin tehfunga hnufual bikna ah theihtawp chhuaha hmalak a pawimawh hle dawn a ti bawk a ni.

Kalkhawmte chuan Siaha khawchhunga hnawm hnawk leh thenfai ngai zual te sawihoin hmalak dan tur an rel a, department hrang hrang chanpual inhrilhhriatna neih niin mawhphurhna nei te chuan theihtawp chhuah tura chah nghal an ni. Vawiina thurel zingah vantlang inthiarna fai taka enkawl te, market shed fai taka vawn te, Siaha khawchhunga wall painting/ mural painting chungchangte, Construction & Demolition Waste thenfai te, tuihawk luan kawr thenfai te leh educational institution-a inthiarna fai taka enkawl te bakah mipuite faina kawnga kan harh thar theih nan awareness material siam te an rel a ni.

Vawiin thutkhawmah hian DEO/DPC, Samagra Shiksha, Siaha District te, MADC a LAD department aiawhte, Education Department aiawhte bakah Joint VC aiawhte an tel a ni.