2958/2024-2025

Saitual, the 13th November, 2024: Vawiin chawhma dar 10:30 khan DC Conference Room, Saitual-ah District bawrhsap Dr. Lalngura Tlau, Committee chairman ni bawk kaihhruaiin District Level Committee on PM Dharti Aaba Janjatiya Gram Utkarsh Abhiyan (DAJ-GUA) chu an thukhawm a, hawnna programme leh district level-a IEC (Information, Education and Communication) hman dan turte sawiho a ni. 

Hun kaihruaitu Dr. Lalngura Tlau chuan kalkhawmte hnenah lawmthu sawiin Saituala central sawrkar scheme kaltlanga District tana hmasawnna lo kal ang angte mitinin an chhawr tangkai theih nana theih tawp chhuah turin kalkhawmte a sawm a, scheme thil tum leh a kaihhnawihte sawifiahna hun a hmang bawk a ni. 

He scheme hi scheme thar niin Ministry Of Tribal Affairs hnuaia scheme hrang hrang hmun ruak hnawh khahna (gap-filling) na tura ruahman a ni a, state, district, block leh village level-ah te line department hrang hrang 18 te hmalaknaa kalpui tura tih a ni a, kum nga (5) chhung awh tur niin thingtlang khua mihring 500 leh a chunglam chennaah 50% Scheduled Tribe awmnaah hmalakna tura ruahman a ni. He scheme hian thil tum lian pui pui pali (4) neiin, kawngpui leh a kaihhnawih siamthat, buh leh thlai thar lama hmasawnna te, zirna tha a awm theihna tura hmalaknate bakah hriselna kawnga hmasawnna tur hrang hrangte a huam tel a ni.

He thutkhawmah hian District Bawrhsap Dr. Lalngura Tlau bakah hian Pu V Laldinsanga, Project Director, DRDO, Pu Micky R Lalenkawla, DEO, Pu A Lalhmachhuana, DAO, Pu Jacob Lalmalsawma, DHO, Dr H Vanlalhmangaiha; District A.H. & Vety Officer, Pi Christina Lalnunfeli, SDC, Pi F Zodingpuii, DIPRO, Pu PC Lalruatkima JE, PWD, Pu H Malsawmzuala, LDC, P&E, Pi Deborah Lalnghakmawii, Fishery Demonstrator (FD) te an tel a ni.