2957/2024-2025

New Delhi, 13th November, 2024 : Pu Malsawmzuala Ralte, Chairman Mizoram Youth Commission chuan vawiin khan National Skill Development Corporation Office, Greater Noida a tlawh a, thawktute nen an inkawm. 

He inkawmnaah hian National Skill Development Corporation (NSDC) kaltlangin Mizo thalai nursing lama background nei te Japan rama care giver a thawk tur lak ni se an ti a, heng mite hian Japan tawng thla 9 chhung zir turin NSDC Office, Noida-ah an awm chilh ang a, tawng an thiam hnuah an hnathawh tur pawh NSDC hian a buaipui vek dawn a ni.

Hei bakah hian Germany rama nurse hna ruakah mizo thalai nurse zir zo tawh te lak a, MYC office, Aizawlah German tawng zirna hawn ni se an ti a, an hnathawh tur pawh NSDC in a buaipui vek dawn a ni.

Israel-a care giver hnathawh tur awmah mizo thalaite an kal ve theih nan, thawh ho ni se an ti bawk.

MYC chairman hian LESDE department kaltlang a, Mizo thalai Japan tawng zir mekte tlawh nghalin, titi hona hun an nei bawk. 

MYC chairman hian Indigo Airlines Office a tlawh bawk a, mizo thalaite tan cabin crew/air hostess lakna MYC office, Aizawlah December 2024 thla tir lama neih turin ruahmanna siam ni se, an ti bawk.