2956/2024-2025

2024 Sahmulphah thla ni 13: Horticulture Department Lunglei leh Lunglei Florist Association te buatsaih ni thum chhung awh tur Florist Fair cum Exhibition, 2024 chu vawiin chawhma khan District Agriculture Complex-ah Lunglei District Horticulture Officer Pu B. Lalzarzova chuan a hawng.

Khuallian Pu B. Lalzarzova chuan Lunglei Florist Association leh District Horticulture Office te'n hma lakna chhinchhiah tlak tak tak an lo neih tawh ṭhin thu leh hmachhawp te pawh an la neih mek thu sawiin, tun ṭuma Florist Fair buatsaihah nikum lam aiin a pho chhuah dan leh a pangpar chi hrangah pawh hmasawnna lawmawm tak a awm tih a sawi a. Lunglei District-ah hmun dang aṭanga pangpar chah luh ngai lova intodelh turin pangpar chingtute'n ṭan lak a pawimawh thu sawiin, mihring pung zelah kawng hrang hrangin pangpar mamawhna a sang zel dawn tih hre renga rilru nei taka hma la tur leh thil chi khat chauh kalpui lo va, kohhran mamawh ang chi te, sawrkarin a mamawh ang chi te, chhiat nia mamawh ang chi te neih tum turin pangpar chingtute chu a chah a. Florist Fair chu pangpar chingtute'n hlawkpui leh hmasawn phah nana an hman a, pangpar lama la tui pha ve lote pawhin pangpar hmanga ei zawnna kawngah tuina thar an neih phah theih nan ṭangkai taka hman a nih a beisei thu sawiin, Florist Fair cum Exhibition 2024 chu a hawng nghal a ni.

Hawnna inkhawm hi Lunglei Florist Association President Pi C. Lalthankhumi'n a kaihruaiin, Rev. LH Lalchhandama'n hunserh a hmang a. Pangpar pho chhuah category hrang hrang paruk aṭanga a ti ṭha pakhatna aṭanga pathumna ṭheuhte hnenah lawmman pawisa fai sem nghal a ni.