2955/2024-2025

Aizawl, the 13th October, 2024: Sawrkar laipui Jal Shakti Minister Pu C.R. Patil hova North East State tin aiawh Minister te'n Swatchh Bharat Mission-Grameen (SBM-G) hnuaia hmalaknate thlir hona hun (review meeting) Guwahati-a neihah PHE Minister Prof. Lalnilawma a tel.

Swatchh Bharat Mission-Grameen hnuaia India hmarchhak state hrang hranga hmalaknate thlirletna hunah hian hnathawh dan leh hmalaknate thlir ho a ni a; hmarchhak state-ah Mizoram sawrkar chu a ti tha pawl ni mahse, hmasawnna tur tam tak a la neih thute he hunah hian tarlan a ni a. Heng hmasawn an ngaihna zawnahte hian PHE Minister Prof. Lalnilawma chuan nasa zawka Mizoramin tanlak a tum thu leh amah ngei pawhin Department-te nasa zawka lo enpui a tum thu review meeting-ah hian a sawi a ni.

Union Jal Shakti Minister chuan North East State te'n harsatna hrang hrang karah theihtawp chhuaha faina leh thianghlimna kawnga hma an la leh hemi rahchhuah tha tak hmuh a ni chu lawmawm a tih thu a sawi a. Individual Household Toilet (IHHT) dilnate ni 30 chhunga buaipui hman tur leh tuna la khaihlak mekte chu ni 15 chhunga zo hman tura kalkhawmte chahin, March 2025 ah chuan 'Sampoorna Swachhata' dinhmun thleng hman tura tan la turin a chah a. Thla tina District Water and Sanitation Mission (DWSM) thutkhawm nei tur leh, 'Hammara Shauchalay: Hammara Samman' Campaign hnuaia hman tur 'World Toilet Day 2024' atan tha taka inpuahchah lawk turin a chah bawk. 

He huna tarlan a nih danin North East State-ah thingtlang khua za zela 51 te chuan ODF Plus Model dinhmun an thleng tawh a. OSD Model Status-ah Sikkim ti tha berin 100% dinhmun a thleng a, Mizoram chuan dawtin 86% ODF Plus Model a thleng tawh bawk a ni. Meeting chuan Sustainable Solid and Liquid Waste Management, Community Sanitary Complex, Plastic Waste Management leh Faecal Sludge Management hmalakna kawnga ngaihven tulte  bakah fund hman dan leh hmanna chunchang bawhzui dan leh pawimawh dangte an sawi ho a ni.

He review meeting-ah hian PHE Minister Prof. Lalnilawma hi Chief Engineer Er. H.Duhkima, MD, Swatchh Bharat Mission - Grameen, PHE Department ni bawk chuan a tawiawm a ni.