2954/2024-2025

Champhai, 13th November 2024: Vawiin khan Champhai  SDO (Sadar) Pu Ngulzathuama pisaah District Sponsorship and Foster Care Approval Committee an ṭhukhawm a. He committee hi Mission Vatsalya /Child Protection Service, Women & Child Development hnuaia din a ni a. District Child Protection Unit ten an kengkawh a ni.

He hunah hian Member Secretary Pi R. Lalrinchhani, DCPO chuan committee agenda leh committee thil tum te member te hnenah hrilhfiahna a nei a. Committee hian kum 2025-2026 chhung atan Champhai District huamchhunga naupang harsa zual bik leh chhawmdawl ngai Naupang 144 te tanpuina sum fai  a pek tur chu an sawiho hnuah an pawm pui a ni. 

He hunah hian Pu Lalthantluanga Tochhawng, Child Welfare Committee Chairman; Pi Lalhmachhuani, Sub-Headquarters MHIP President leh Pi Vanlalhruaii, Protection Officer te an tel a ni.

Juvenile Justice (Care and Protection of Children) Act, 2022 chuan a tul tawp khawkah loh chuan naupangte hi Child Care Institution-ah dah loh tur an ni, a ti a. Hemi bawhzui zel nan hian Mission Vatsalya hnuaiah naupang harsa zawk te chu an ei leh in, hriselna leh zirna senso chhawmdawl nan thla tin cheng 4000 a tanpui thin an ni a. Heng tanpuina leh chhawmdawlna te hi Approval Committee in an pawm pui (approve) hnuah chauh pek thin a ni. He scheme hnuaia tanpuina dawng thei naupang thlanna tehfung chu:

1. Naupang enkawltu ber a nu hi pasal sun emaw then emaw a chhungten an tuithlar emaw a nihin.

2. Naupang fahrah a ni emaw, chhungkhat hnaivai ten an chenpui te.

3. Naupang nu leh pa te natna khirhkhan vei an nihin.

4. Naupang nu leh pa te'n retheihna vang emaw harsatna bik riau emaw avanga an enkawl theih lohin.

5. Naupang a bik taka venhim ngai eg:- chhiatna vangte, tih luihna a hnathawh tirte, nupui pasal neih luihtirte, tlanbo te, HIV(AIDS) vei te, rualbanlote, kutdawh leh chenna hmun neilo te leh tihduhdah tuar te.

6. PM Cares scheme hnuaia awm te. (Covid vanga nu leh pa chan te)