Mizoram College Teacher’s Association in ni hnih awh tur 36th Annual General Conference vawiin dar 10 a Synod Conference Centre a an hman ah Pu R. Lalzirliana, Home Minister leh Pu H. Zothangliana, Parliamentary Secretary, Higher & Technical Education in an hmanpui.

Khuallian Pu R. Lalzirliana chuan Mizoram College zirtirtute chu ram hnuk an nihzia sorkarin hriain an mamawh leh harsatna te pawh ngaithla in tih hlawhtlinpui leh hriatthiamna nasa tak a nei tih sawiin chu chu anmahni MCTA te pawhin hre tur leh an mawhphurhna sanzia hriaa thahnemngai taka naupang te zirtir a mi chhenfakawm ah chhuah turin a chah. Keimahni nihna kan ngaih pawimawh tawk loh chuan kan zahawm thei lo tih sawiin khuallian chuan anmahni pual bik a programme an siamah an member tello engemaw zah an awm pawi a tih thu sawiin member te kal an tam chuan thil pawimawh ngaihtuah hona ah finna pawh a paw chhuak nge nge a ni tiin mi zir sang a nih loh avanga amah ngei chuan zirna leh thiamna pawimawhzia a hriat chian thu leh thiam satliah mai lova thiam tak tak na leh chhenfakawm nih a tul thu a sawi a. Ama chanpual mai bakah Chief Minister awm loh changa charge a lakna ah sorkar hnathawk lian tak tak te pawh an file kalpui dan inan loh thu sawiin Home Minister chuan College zirtirtute chu an hna ah an tihthat peih loh chuan mi naran an chhuah teuh ringawt ang tih a hlauhawm thu a sawi a.

Zirna siam tha turin vawiin hi a la tlai lovin, siamthat theih vek a la ni in Mizote khawvela lang chhuak thei tura min pho chhuak thei tur chuan zirtirtute an pawimawh thu a sawi a. Vawiin a college zirtirtute hian kan ram tan enge kan tih ang, zirlaite chu zirlai an nih angin zirtir an ngai a, kaihruaitu tel lova awm thei lo an ni, chu mi mawhphurtu leh hlawhtlinna chu a zirtirtute an ni Pu Lalzirliana chuan a ti. Naupangte chu chhawrtlak, hman tlak leh rawih tlak ni turin kan hrual tha tawk em tih in enfiah reng tur leh hmasawnna lama zirlaite tuaihriam thei zel tur in zirtirtute chu inzir chho zel tur leh sorkar ngei pawh thurawn tha tak pe thei tura in zir turin a chah nghal a ni.

Pu Thanglura, President, MCTA kaihhruai vawiin programme ah hian khual zahawm Pu H. Zothangliana, Parliamentary Secretary, Higher & Technical Education pawhin thu sawiin college zirtirtute chu inthunun thei mi ni tur leh an thil tih leh sawiah an tih atan a mawi a ni em tih ngaihtuah fo tur a chahin sorkar hnathawk dang, hlawh tam lo zawk mahse sorkar tana tlaivar thak a thawk thin an awm tih hriaa an thiam, an finna te ram leh hnam hmasawnna atana nasa zawka hmang turin a ngen.

6th MCTA Annual General Conference ah hian thupui hrang hrang zirhona leh sawihona hun an hmang a ni.