Mizoram Cooperative Apex Bank Ltd. chuan vawiin khan Vanapa Hall ah 20th Annual General Conference an hmang a, Cooperation Minister Pu J.H.Rothuama’n a hmanpui.

Khuallian Pu J.H.Rothuama chuan Mizoram Cooperative Apex Bank Ltd.-in hmasawna a thang chho zel chu lawmawm a tih thu a sawi a, Head Office building thar leh computerisation atana sum tam tak seng chunga hlepchhuah an nei thei chu chhuanawm tham a ni, a ti. Mipui tangruala hmalakna chu a tangkai zia hriaa khawvel puma uar taka kalpui mek chuan nasa takin hmasawnna a thlen thin a ni, a ti bawk. Kohhran tam takin Biak In sak nana Apex Bank atanga Loan an lak thin chu Zoram mipui te tan a tangkai hle a ni tiin Minister chuan Apex Bank sum neih tihpun nan a neitu Society leh Shareholder ten Share an lei belh zel a tul hle a ni, a ti bawk. Bank-a thawktute chu mipui tana thawk an nih hre renga dawr nuam taka awm thinturina chah bawk.

Mizoram Cooperative Apex Bank Ltd. hi kum 1982 ah din a ni a, tunah hian Mizoram pumah Branch 12 an nei mek a ni. Board of Directors-in enkawlin thawktu 166 an awm mek bawk. Kum 2012-2013 chhunga Deposit ah Rs 43,760 lakhs hmuh tum a nih laiin a taka hmuh chu Rs 43,214.33 lakhs a ni a, Loan pek chhuah tur target Rs 10,131 lakhs ah Rs 10,223.52 lakhs pek chhuah a ni thung. Apex Bank atanga Loan latu te hi Life Insurance an tihsak thin a, kum kalta chhung khan Loan latu boral mi 10 hnenah Lic atangin Rs 27,31,421 an claim chhuah sak a ni. Apex Bank hian Farmers Club 11 an nei mek a, member 121, buh leh vaimim chingtute tan Crop Insurance an tihsak bawk.

Vawiin Annual General Conference hawnna hi RCS Pu Lalpekliana’n a kaihruai a, CEO Pu Ropiangliana’n kum kalta chhunga an hmalakna te report a pe bawk. Rorel leh Board of Directors inthlanna te an nei zui dawn a ni.