Vawiin chawhma dar 11:00 khan Serchhip District Bawrhsap kaihhruainain ama Pisa-ah Serchhip District chhunga Public Information Campaign neih dan tur an thlir hova, Pu Mangzangam Touthang IIS, Chairman, Core Committee, PIC, Mizoram chuan a ho a ni. He meeting-ah hian Central Sawrkar Flagship Programmee hrang hrang  chungchanga mipuite zirtirna leh hrilhhriatna neih tur atana department hrang hrangte thawhho dan tur an ngaihtuahho a ni.

September ni 11 atanga 13, 2013 chhung hian Serchhip district chhunga khaw hrang hrang pathumah Public Information Campaign hi neih tura ruahman a ni a, a hmunpui ber tur New Serchhip YMA Hall-ah hian ni thum chhung neih tur niin ni September 11, 2013, a tantirh ni hian khuallianah Pu Lal Thanhawla, Chief Minister leh Bialtu MLA ni bawk chu beisei a ni. September ni 12 leh 13 hian Khawlailung leh Keitumah te campaign chikhat atan Health Camp neih tel tura ruahman a ni bawk.

He meeting-ah hian department hrang hrang, central sawrkar scheme enkawltute chu an department enkawl theuha an hnathawh leh hlawhtlinna chanchin, mipuite hmuh theiha phochuak thei turin hma la tura tih an ni a, mipui tam zawk kohkhawm an nih theih nan leh he Public Information Campaign hi a hlawhtlin theih nan chanchinbu mite pawh a theih ang anga hma la tura beisei an ni bawk.

He thutkhawmah hian Serchhip district bawrhsap Pi Juhi Mukherjee chuan officer-te chu sawrkarin mipuite hmasawnna leh hamthatna atana hna a thawh hi mipuite hnena puangzar thiam turin a fuih a, private company leh pawl thenkhat ten mipui rawngbawlna atan thil tê tham tê pawh an tihin nasa takin an inpho langsar thiam thin a, mahse thil engkim deuhthaw tihsaktu sawrkar thiltih hi mipuite hian an hre lo zawk fo thin a ni tiin department head-te chu Information & Public Relations Department hmang tangkaia, an department hnathawh leh hlawhtlinna te mipui hnena a tam thei ang ber puangzar thin turin a chah a ni.

Pu Mangzangam Touthang pawhin department officer-te chu campaign hlawhtling tak neih a nih theih nana theihtawp chhuahpuiah sawm a, meeting zawh hian District Information & Public Relations Office, Serchhipah campaign chungchanga hmalak dan turte sawi hovin Serchhipa chanchinbu mite a kawm zui leh nghal bawk a ni.