Vawiin khan Education Minister Pu Lalsawta chuan Chanmari YMA Hall-ah Mizoram CSS Hindi Teachers’ Association (MCHTA) Special Conference a hman pui.
Pu Lalsawta chuan CSS Hindi zirtirtute chu a hun taka hlawh an lak theihloh avangin nitin khawsaknaah pawh an buai phah hle tih Sorkarin a hriatpui thu a sawi a, an hlawh chu Ministry of Human Resource Development-in za-a-za a rawn pek tur a ni a; hemi chungchang buaipui tur hian department official-te an in tirh fo thu sawiin, “Tunah hian in thla thum hlawh tur chu Finance Minister-in min ngaihtuahsak a, hei hi NLUP pawisa atanga lo hman lailawk tur niin, a dangte pawh a hringtu che u kan nih angin, kan ngaihtuahsak zel dawn che u a ni,”a ti bawk. Education Minister chuan CSS Hindi zirtirtute chu an dawhtheihna avanga lawmthu hrilhin, thudik ziktluaklo thehdarh kawngahkanfimkhur tlan a pawimawh a ni, a ti bawk.
Hindi tawng pawimawhzia sawiin, phai lam nena indawr kawngah leh mimal tan pawh Hindi thiam chuan nasa takin kawngro a su dawn a ni, a ti a. Hindi kan zirdanah sorkar chuan kalphung thar a ruahman thu sawiin, zirlaite chu Hindi tawng hman tam tir an ni anga, hei hian anmahniah tuina leh zir phurna pein, “Hindi tawng hi a takin kan thiam tawh dawn a ni,” a ti bawk. Sorkar chuan zirna mitin huapzo leh khawvel mila her danglamturin hmachhawp a nei a; tum mumal leh fel tak nen, working grourp leh task force-te dinin, hlawhtling ngei tura hma chak taka lak a nih thu a sawi bawk.
He hun hi Pu Joseph RVL Muanpuia, Vice President, MCHTA chuan a kaihruai a, Pu Lalzarmawia, Asst. General Secy. hnen atangin Report ngaihthlak niin, Mary R. Lalrinmuanpuii’n Finance Report a pe bawk. Pu Lalchungnunga, Deputy Director, School Education hnen atangin thusawi ngaihthlak a ni a, Pu C. Lalhriatpuia, President chuan lawmthu sawiin hun a khar a ni.
Mizoram CSS Hindi Teachers’ Association (MCHTA) hi kum 2011-a din niin, Sub-Headquarters hi District panga- Champhai, Kolasib, Mamit, Lunglei leh Serchhip-ah te an nei a; Aizawl, Lawngtlai leh Saiha District-ah te Convener an in dah bawk. Tunah hian CSS Hindi zirtirtu hi Middle School-ah 916 awmin, High School-ah 389, an vaiin 1305 an awm mek a ni.
