Nimin Zirtawpni khan Mizoram chhunga District hrang hrang Krishi Vigyan Kendra (KVK) ten kum 2018-2019 chhunga an hmalakna thlirletna leh kum 2019-2020 chhunga KSHAMTA (Knowledge systems and Homestead Agriculture Management in Tribal Areas) leh NARI (Nutri-Sensitive Agriculture Research Innovations) hnuaia hmalak dan tur ruahmanna thlirhona hun, Mamit District KVK Training Hall, Lengpuiah an hmang a, he hunah hian Mizoram District hrang hranga KVK Head and Senior Scientist te telin Dr.B.C.Deka, North East, Zone VII hnuaia ATARI Director chuan a hmanpui a ni.

Dr. B.C.Deka, North East, Zone VII ATARI Director chuan Mizoram District hrang hrang KVK ten KSHAMTA leh NARI hnuaia an hmalakna leh ruahmanna siamte chu tha a tih thu sawiin pipute atanga lo leh huan kan neih dante chu thiamna sang zawk hmanga thlak a tul thu leh hmasawnna nasa zawk a awm theih dan te a sawi a. Hriselna kawngah kan thanharh a tul thu leh thlai chin turah pawh hriselna leh taksa tana chakna pai tam thlai thlan thiam a tul thu leh khawtinah loneituten Nutritional Garden an ngaih pawimawh a tul dante a sawi bawk.

Thu a sawi zawhah Dr. B.C. Deka hian Mamit KVK in Skill Trainibg of Rural Youth hnuaia KVK Demonstration Farm, Lengpui a Mushroom cultivation, Vermicomposting leh Piggery hnuaia training mi 20 te hnenah Certificate a hlan nghal a ni.

Nimina Mizoram chhunga District hrang hrang KVK Head & Scientist ten Review Meeting leh Action Plan thlirhona an neih hnuah Mamit District KVK Head and Senior Scientist Dr. Vanlalhruaia Hnamte in lawmthu sawina neiin a khar a ni.