Vawiin ah khan Mizoram Educational Foundation (MEF) chuan General Conference cum one day State Level Workshop ‘Quality Education at the Pre-Primary and Elementary Level,’ I & PR Conference Hall-ah an hmang.

Workshop hi Dr. Lalthansangi, Associate Prof. Aizawl College in a kaihruai a. Keynote address Dr. Hmingthanzuala, ICSE in pein, Elementary Stage-ah hian pianpui tawng uar tulna leh MEF hi pressure group a nih loh avangin inkaihhruaina tha erawh zawimuang leh uluk taka kalpui reng a nih thu a sawi.

Prof. Lalhmasa-i Chuaungo, Education Dept. M.Z.U chuan Quality Education Pre-Primary Level-a Paper buatsaihin, kum 6 chin hnuai lam a huam thu te, naupang Creativity Level chherna hun tha a nih thu te, Emotional Level leh midangte nena nunho dan zirtir a tul thu bakah formal-a darkar thum zirtirna kalpui lova a karah infiamna hun te, thil mawi hriatthiamna hmun inzirtirna te a tul tih a sawi.

Dr. Lalbiakdiki Hnamte, Education Dept. M.Z.U chuan Quality Education at the Elementary Level chungchang sawi ve thungin, India Hnampa Mahatma Gandhi-in zirna tak tak chuan anmahnia a tha ber a la chhuak tur a ni, thil tul lo leh awmze nei lo tam tak an thluakah a khung ringawt tur a ni lo, chuti lo chu an theihna dik tak paw chhuak lovin khawl ang maiin a chhuah thin a ti a. Quality tih hian anmahni thlen chin mila an zir chhuah ngei ngei tur an zir chhuah leh a bituk siam a kawk a ti a. Tin, eng hnam pawh, eng hmun ami pawh, hmeichhe naupang leh mipa naupang thliar lova intluktlang a zirtirna pek uar a nih thu a sawi. Heng bakah hian School building leh hmanraw chi hrang hrang tha tawk te, darkar li/nga School kai chhung awmze nei taka hman, zirtirtu trained leh inpe zo, training-na changtlung zawk, awmze nei taka zirna School vil, zirlaibu ennawn leh tunlai mamawh mila siamrem, exam her danglam naupang te tana hahthlak loh zawngin tih te hi a Paper tlangpuiin a tarlan te chu an ni.

Mithiam paper buatsaih chhawpchhuah tak te hi sawiho a nih hnu ah MEF te hian General Conference an hmang zui nghal a ni.