ICMR ( Indian Council of Medical Research) Govt. Of India in Pu Ronald Sapa Tlau, Rajya Sabha MP ngenna anga Mizorama mithiam a rawn tirh te chuan Saiha ah karkhat chhung chamin IMR (Infant Mortality Rate/ Nausen thihna) a sanna chhhan zirchianna an va nei. Hemi rual tho hian ICMR Team dang pawhin Mizoram an tlawh a.Anni hi chuan Mizorama cancer hluarna chhan rawn zirchian pahin chhul-kawngka(cervix) cancer hma taka hmuhchhuah dan chungchanga inzirtirna Mizoram doctor te tan an buatsaih thung a ni.

He Research Team lo kal te hi Dr.Malabika Roy, Dr. Samiran Panda, Dr. Alok K.Deb te an ni a. Anni hian April ni 17-24 inkar chhung khan IMR sanna chhan hriatchhuah tum in Saiha District a khaw hrang hrang te tlawh kual a ni. Heng an zirchianna report te hi nimin khan Health Minister Pu Lal Thanzara, hnenah an pe a, Minister ho hian Health Department hotute nen hmalak dan tur an sawi ho nghal a ni. ICMR Team te hian nau pai laia inentir ngaihthah tam tak an la awm thu te, ei leh in leh zuk leh hmuam tih nasat avanga nu leh nauvin harsatna an tawh thin thu te an sawi uar hle a. Chet phung leh nitin khawsak thianghlimna kawnga kan la san tawk loh thu te pawh an tarlang a. Duh anga tui intur a thianghlim tawk loh thu te sawiin hemi kawnga PHE Deptt. te nena tan lak tlan dan tur te pawh sawiho a ni bawk. Tin, nu leh nau hriselna kawnga kan hriatna a la hniam hle niin an tarlang bawk a, mipui zirtirna tam zawk neia theihtawp chhuah a pawimawh zia thute an sawi uar hle a ni.