Khuarel chhiatrup thlen thulha mipui ten an in ralrina, an invenhim thiam theihna tura inzirtirna atan tukin khan Aizawl, Darlawn, Saitual leh Aibawk ah sikul naupang ten kawng an zawh.

Aizawl District Disaster Management Authority(DDMA) bultuma kawngzawh 'District Rally on Towards Resilient Schools' hi National School Safety Programme hnuaia huaihawt a ni a. Aizawlah chuan zirlaite hian zing dar 7 ah Sikulpuikawn leh Chanmari atanga kawng zawh tanin, Vanapa hall kawtah an in tawk khawm a ni. Kawngzawhna ah hian zirlaite hian khuarel chhiatna chi hrang hrang laka inven him dan leh kawng chi hrang hranga mipuite inralrin theihna tur zirtirna thuziak chi hrang hrang an pholang a, au hla chi 17 auchhuah puiin, heng zing a langsar zual zingah Linghing laka I insak a lo him nan mithiam te rawn thin ang che, leimin laka I him theih nan tuiluankawr tha siam rawh, Cyclone tleh hun laiin TV leh Radio ah Cyclone warning ngaichang thin rawh, vanduaina rapthlak alo thlenin thu belhchian dawllo sawichhawng suh tih te bakah Lir a nghin-in chi-ai suh ang che tih thupuite hmangin an aurual a ni.

Vawiin zirlaite kawngzawh ah hian sikul 250 atangin sikul 1 zel atangin 20 aia tlemlo an tel a. Vanapa hall a a kharna hun ah DDMA aiawh Pu Daniel Sailo, Zonal Officer chuan, he kawngzawh hi khuarel chhiatrupna thlen thulha mipuite inven thiam theihna tura zirtirna atana ruahman anih thu sawiin, tunhnaia chhiatna thlen laia mi thenkhat ten Social Media kaltlanga thu belhchian dawllo hmanga mipui an ti chiai chu tha a tih loh thu a sawi a, tunhnaia thli na tak thawk chu Cyclone a ni lova, Cyclone chu tuipui atanga thawk thin, kawng bik nei, a tul anga 'warning' pek lawk theih a ni tih hriat a tul thu leh Mizorama lirnghing thleng mai tura thuthang diklo pawh sawifiahin, Lirnghing chungchangah hian mithiam ten tun thlengin a thlen hun tur leh thlenna hmun tur an sawi lawk theilo tih a sawi bawk a ni.