State Election Commission chuan The Aizawl Post in Tlabung MZP thuchhuah a chhuah chhawn chu mipui rilru hruai kawi thei ah ngaiin a hnuaia tarlan ang hian sawifiahna a siam.

The Aizawl Post chanchinbu ni 27.4.2015-a chhuak Bornasury/Boranasury Village Council siam dan chungchanga mipui ngaihdan hruai kawi thei lam hawia District paruk huamchhunga Village Council inthlan neih laia, Tlabung MZP thuchhuak lo lang hi State Election Commission chuan pawi a ti hle mai.

Boranasury Village Council hi Lawngtlai District, Chakma Autonomous District Council huamchhunga awm a ni. He khuaah hian In 71 a awm a, vote nei thei pawh mi 138 an ni. Sub-section (2) of Section 3 of the Chakma Autonomous District Council (Village Councils) (Amendment) Act, 2014- in a phal angin VC member 5 (General 4 leh Reserved 1) nei thei an nih bakah ruat seat pahnih nei thei an la ni a. February 26, 2015 a Chakma Autonomous District Council hnuaia Village Council inthlan ah khan an ni khua pawh hian an thlang ve a ni. Scheduled Area huamchhunga Village Council inthlan hi an mahni pual bik Rules nei an ni a, chu pawh chu an mahni siam a ni a, chuvang chuan tuna District paruk huamchhunga Village Council inthlan nen hian ngaih fin chi a ni lo.