Mizoram Education Service neiturinchak taka hmalak mek a ni. He thu hi vawiina State Level Science, Mathematics & Environment Exhibition 2013-14 kharna programme Chaltlang High School-a a hmanpuinaah Parliamentary Secretary Pu Joseph Lalhmimpuia  sawi a ni.

Vawiin khan hnih awh nimin a tan State Level Science, Mathematics  & Environment Exhibition 2013-14 NCERT , New Delhi leh Science Promotion Wing, SCERT tangkawp buatsaih chu khar a ni a, programme kharna inkhawm hemi hmun veka neih hi Parliamentary Secretary Pu Joseph Lalhimpuia’n hmanpuiin Exhibition-a titha te hnenah lawmman a sem nghal a ni.  

Pu Joseph Lalhimpuia chuan Mizoram hian Education-ah bungthar kankai a pawimawh a hemi atan hian Mizoram Education Service (MES) neih thuai a pawimawh hle a, MES nei turinchak takin hma kanla chho mek a ni, a ti. Mizoramah zirna siamthat kawnga ‘pek leh lak’ ‘give and take’ neih a ngai a, he thilah hian Education Department hnuaia thawktu zawng zawngte leh pawl hrang hrang te chuan mahni leh pawl hmakhua chhauh ngaituah lovin, engtin nge Mizoram pum hian kan that puia ram in zirna lamah hma sawnin ke kan pen chhoh theih ang tih an ngaituah tel a hmalak hi a pawimawh takzet a ni, a ti bawk.

Parliamentary Secretary chuan Mizoram mai nilo ram pumah hian zirlai thiamthei zawkten Pawl 12 zawha professional line hrang hrang an zawm a, Science leh Mathematics college lamah zirzawm an tlem a, hei hian ram hmasawnna leh than chhoh zelna  thui tak a ti thuanawp tih mithiamten an zirbingna atanga an hmuhchhuah thu a sawi. Chuvangin, Science leh Mathematics a tankanlak a ngai a, hemi kawngah hian vawiina zirlai naupangte naktukakanram hruaitu ni tur te hian ram hmasawnna leh ram ropuina tur kawngah mawhphurhna sang tak an nei a, an kal zelnaah he thu hi ngaihtuah se tiin a duh thu a sawi.

National Council for Educational Research & Training (NCERT)-a Science and Mathematics Department atanga lokal Dr. Chong Shimray chuan he Exhibition a tel naupangte chu Science leh Mathematics lamah an phur nia a hmuh thu sawiin nakum lamah chuan hei aia naupang tam zawk tel thei se tiin a duh thu a sawi.

State Level Science, Mathematics & Environment Exhibition vawi 34-na kharna programme hi SCERT Director  Pi Malsawmthangi chuan kaihruaiin Pu R. S. Chauhan, Deputy Director, Science Promotion Wing chuan Exhibition chanchin tlangpui sawina hun a nei.

34th State Level Science, Mathematics & Environment Exhibition 2013 – 14 ah hian Mizoram khaw hrang hrang atangin Higher Secondary School 4 leh High School 14 atang tein zirlai 58 telin model 58 an siamte chu an phochhuak a. Exhibition thupui chu ‘Science & Mathematical Innovations’ niin model leh exhibit te hi peng hrang hrang panga – Agriculture, Energy, Health, Environment leh Resources ah te then a ni a. Hengte hi Jury mithiam pathum – Prof. Lalnundanga, Department of Forestry, MZU; Pu Lalrinthara, Assistant Professor, PU College leh Pu J. Lalvohbika,  Assistant Professor, PU College te chuan endikin a titha te an tlang a ni.

Exhibition ah hian  mimal leh a sikul zawngin lawmman siam a ni a, a pumpuia sikul tithe ber chu St John’s HSS Kolasib niin pahnih chu St. Paul’s HSS, Aizawl leh pathumna chu Govt. Mizo HSS, Aizawl te an ni.

Agriculture sub-theme a pakhatna leh pahnihna chu Lalthakima, St John’s HSS Kolasib leh P. C. Lalawmpuia, St. Paul’s HSS, Aizawl te an ni a. Environment sub-theme a pakhatna leh pahnihna chu Lalnunmawia, St. Paul’s HSS, Aizawl leh Grace Lalsiamliani Greenland HSS, Aizawl te an ni a. Health sub-theme a pakhatna leh pahnihna chu Stephen Sailianthanga, St John’s HSS Kolasib lehjammy Vanhmingliana, St. Paul’s HSS, Aizawl te an ni a. Resources sub-theme a pakhatna leh pahnihna chu Lalhruaipuii, Govt. Mizo HSS Aizawl lehK. Lalhmingmawii, Greenland HSS, Aizawl te an ni a. Energy sub-theme a pakhatna leh pahnihna chu Eddie Zoremsanga, St John’s HSS Kolasib leh Rohmingliana, Govt. Vengsang HS Champhai te an ni a. Hei bakah hian Mathematical Modelling atan Heisnam Alice Devi, St. Paul’s HSS, Aizawl chu lawmman pakhatna pek a ni bawk.

Exhibit 58 zawng zawngte hi a chanchin kimchang nen SCERT chuan NCERT ah an thawn thla dawn a, chumi atang chuan NCERT  lamin National Level-a tel tur an tlang dawn a ni.