Vawiin khan MZP Hqrs. Lunglei chuan zirlai tithate chawimawina hun Saikuti Hall-ah an buatsaih a, LAD Minister Pu PC Lalthnaliana chu Khuallian chan changin he hun hi a hmanpui a ni.

Khuallian Pu PC Lalthanliana chuan HSLC leh HSSLC a zirlai titha bikte chawimawi hi an phu hle a, Mizote hian ngaih hlut tur leh chawimawi tur dik kan hriat a hun hle tawh a ni, a ti. Tuna zirlaite hi nakina an eizawnna kawng hrang hrangah pawh thiamna a pawimawh hmasa ber a ni tih hre reng tura chahin Minister chuan hlawhchhamna tawh hun pawh a awm ang a, chu chu hlawhtlinna bul intanna tur a ni tih hria a, chhel taka beih zel turin a fuih a ni.

Khual Zahawm AMFU Gen. Hqrs. President Pu Joseph H.Thanzuala pawhin thu sawiin ram siam tha turin thalaite an pawimawh hle a, zirna kalpui dan pawh thiamna pawchhuak zawng leh chhawrtlak ni tura kan her rem a ngai a ni, a ti bawk.

Vawiina MZP Hqrs. Lunglei-in zirlai tithate chawimawina hunah hian HSLC leh HSSLC Top Ten-a langte bakah hian Lunglei District chhunga HSLC Distinction-a pass mi 29 leh HSSLC Distinction-a pass mi 7 te hnenah chawmawina thuziak hlan an ni a. Zirlai zaa za pass awmna school HSLC 14 leh HSSLC 6 te hnenah chawimawina hlan a ni bawk. HSLC top ten a lang mi 3 - Rochansangi (Sacred Heart School), C.Ramdinpuii (Baptist Higher Secondary School) leh Lalbeiseii (Sacred Heart School) bakah HSSLC top ten-a lang - F Lalawmpuii (Samdaben HSS) leh K.Lalengmawii (Baptist HSS) te hnen ah Minister Pu PC Lalthanliana chuan Laptop leh chawimawina thuziak a hlan theuh bawk a ni.

Vawiin a zirlai ti tha chawimawina inkhawm hi Benjamin Vanlalfela, Vice President MZP Hqrs. Lunglei-in a kaihruai a, MZP General Hqrs. Aizawl atangin hruaitu engemawzatin he hun hi an rawn hmanpui bawk a ni.