Vawiin khan Agriculture Committee Room-ah Mizoram Ethics Committee Chairman Rev. C. Rosiama leh Secretary Major Dr. J. Thanruma hovin Agriculture Officers meeting neih a ni.

Meeting kaihruaitu Dr. C. Lalzarliana, Director of Agriculture (Crop Husbandry) chuan sawihawnna neiin kum 2012-2013 chhunga buh leh thlai dang thar tam a nih theihna tura kaihhruaina tlangpui leh hemi atana mamawh sum leh thil dang chungchangte a sawi fiah.

Rev. C. Rosiama, Chairman, Ethics Committee chuan Mizoram Sorkar hnuaia Department hrang hrang hmalaknate an thlir thin thu leh Agriculture Department hmalakna thar avanga Ethics Committee an lawm thu a sawi a. Nikum lama India Today-in ‘Most Improved Small State in Agriculture in India’ chawimawina Mizoram Agriculture Department hnena a hlan thu te, kar tin Thawhtanni apianga Officer-hovin Meeting neia an hnathawh dan uluk taka an thlirho thin dan te, Department sum hman dan Officer-hovin an hriat tlan vek thu te leh hun rei tak tih loh theih loh emaw an lo tih thin, thlai chi leh thil dang supply chungchanga mimal sum insiamsakna kawngpui hawn thin te pawh tih tawh loh a nih thu an hriat avanga Ethics Committee-in lawmawm a tih thu a sawi.

Ethics Committee Chairman chuan, Agriculture Department-in buh thar tam kum an puang ngam chu ngaihsanawm a ti a, an hnathawhin loneitute hnen a thleng tha lehzual dawn nia an hriat avanga beiseina sang tak an neih thu leh mi thiam rualten beng sika ngaihtuah hova, tih takzeta hmalakho a nih chuan kar lovah a tha zawngin Change a thlen tur thu a sawi a. Department sum a kalna tur taka kaltir a nih chuan rei lo te chhungin hmasawnna a lan tur thu sawiin, loneih chu hahthlak thlawn maia ngaia sum awlsam indap siak mai duh khawpa rilru ngelnghet nei thei tawh lo mi tam takte tan Agriculture thatzia lantir tura tan la zel tura fuihin beiseina sang tak nen mi thiam rualte hmalakna chu an lo thlir reng thu a sawi bawk.

He Meeting-ah hian kum 2012 chhunga buh leh thlai dang thar tam a nih theihna tura ruahmanna hrang hrang siam chu sawiho a ni a. District 8-a DAO theuh te leh an Subordinate Officer 1 theuh bakah Directorate of Agriculture (Crop Husbandry) hnuaia Technical Officers (AEO chin chung lam zawng) an tel a ni.