Mizoram Football Association chuan vawiin nileng khan Arya Mess, Khatla-ah General Body Meeting an nei a, Sports Minister Pu Zodintluanga chu khuallian a ni.
Sports Minister chuan Mizo thalai ten infiamna kawng tin rengah hma an sawn a, Football-ah phei chuan Mizo inkhelthiam te tel lovin ram pawnah India Team an feh chhuak thei tawh lo, a ti. Infiamna hmasawnna tura sorkarin chak taka hma a lak dan sawiin Minister chuan naupanlai atanga zirtirna tha an dawn theih nan Catch Them Young kalpui a nih thu te, infiamna hmanrua thalai ten an mamawhzia hriaa State dang tam takin an neih ve loh phaitualhnim lem khelmual pathum laiah phah a nih tak thu te a tarlang a. District hrang hranga hma an lak dan sawiin October thla chhunga Serchhip-ah Stadium hawn tum a nih thu te, Champhai a Stadium sakna tur hmun lei fel a nih tawh bakah ruahmanna Detailed Project Report (DPR) siam zawh a nih tawh thu te, Serkawnah khelmual zau tak siamna tur DPR peihfel a nih thu te, Kolasib a Stadium sakna tur DPR siam mek a nih thu te, khaw tam takah khelmual laih leh cheithat anih thu te a sawi a ni. Charity Cup 2012 khelh tuma Chief Minister-in Lammual-ah eng dah a nih tur thu a lo sawi tawh chu Sports Minister Pu Zodintluanga chuan chak taka bawhzui a nih thu leh DPR peihfel a ni tawh thu a sawi bawk.
He hun hmanpui tu Rajya Sabha MP, MFA Chief Patron ni bawk Pu Lalhmingliana pawhin infiamna chi hrang tam tak zingah Football chu Mizo ten hriat kan hlawh hmasakna ber a ni tih sawiin inkhel thiam te leh MFA hruaitute chu Mizoram tan nasa lehzuala an theihna hmang turin a fuih a ni.
MFA General Body Meeting kaihruaitu an President, Pu Lal Thanzara, Parliamentary Secretary pawhin thu sawiin Mizoram sorkarin infiammi te tana kawng zau taka a hawn chu tangkai taka hmang turin thalaite a chah a. Association hruaitute pawhin State pawn mai ni lo, khawvel pum huap infiamna tualzawla khel phak infiammi tha tam tak chherchhuak tura an mawhphurna hria a tan la sauh sauh turin a fuih bawk.
Vawiin inkhawmah hian kum 2011- 2012 chhunga India aiawha ram pawna fehchhuak Footballer sawmpathum te hnenah khuallian Sports Minister chuan chawimawina thuziak a hlan a. Chawimawina dawngtu infiammi te chu Jeje Lalpekhlua, Hnahthial; Lalrozama Fanai, Bawngkawn Chhim veng; Lalrindika Ralte, Lunglei; Robert Lalthlamuana, Khawzawl; Malsawmfela, Ramhlun South; Lalnunmawia, Ramhlun South; Vanlalthlamuana, Ramhlun South (U-16); Vanlalduatsanga, Mamit (U-16); Lalrammuana, Ramthar (U-16); Lalramzauva Khiangte, Luangmual (U-16); Daniel Lalhlimpuia, Serchhip (U-16); Zonunmawia, Champhai (U-14) leh Jerry Lalrinzuala, Bethlehem Veng (U-14) te an ni.
Honorary Secretary Pu Lalnghinglova Hmar chuan 2011-2012 chhunga MFA chetvelna report a pe a. India rama a hmasa ber ni turin FIFA Grassroot Football School chu Aizawl-ah dah a nih tur thu a tarlang tel bawk. Chawhnu lamah rorel niin District hrang hrang atanga lut Agenda 15 ngaihtuahho a ni.
