2568/2025-2026

Dated Aizawl, 8^th December 2025: Vawiin khan Mizoram Finance & Accounts Services Association chuan Annual General Conference vawi 30-na Aijal Club-ah an hmang a, Home Minister Pu K. Sapdanga chuan khuallian niin hun a hmanpui a, Association President Pu Vanlalsawma’n inkhawm hi kaihruai a ni.

Home Minister chuan MFAS-te chu Mizoram sum leh pai enkawltu an nih avangin mawhphurhna pawimawh tak chelhtu an nih thu a sawi a. Fimkhur tak leh uluk thei ang bera hna thawk turin a chah a. Mizoram chu mahni thawh chhuah nei chaurau tak (resource deficient state) kan nih thu sawiin tun dinhmuna kan sum hmuhna tam ber pawh debt financing/loan lam a nih thu te, project lian tak takte pawh JICA, World Bank leh a dangte aṭanga nakina la rulh leh tur, ‘Externally Aided Projects’  an nih thute sawiin leibaa innghah nasat lutukna aṭanga kan tal chhuah theih dan tur te ngaihtuah a, sum hnâr ṭha zawk hmu chhuak thei tura ngaihtuahnate seng turtein MFAS officer rualte chu a chah a.

Tunlai khawvelah chak zawk leh rang zawka hna thawh theih a pawimawh thu sawiin, hmasawnna hna, central scheme leh funding tam takte pawh hun bi tuk nei leh chumi chhunga Utilization Certificate theh luh ngaite an nih ṭhin avangin, sanction leh approval te pawh chak zawka kalpui dan kawngte ngaihtuah a tul thu te; pension leh GP fund chungchangte pawh tunlai digital technology hmanga awlsam zawka kalpui theih dan zawng zel tur te leh, a pawimawh berah chuan mipui rawngbawltu an nih inhre renga, dawr nuam tak leh mite ṭanpui duhna rilru pua ṭan la thar zel turin MFAS officer rualte chu a chah a ni.

Vawiin hun hmannaah hian khuallian Pu Sapdanga chuan ‘MFAS Directory 2025’ a tlangzarh nghal bawk a; MFASA Adviser Pu Ramchuana pawhin thu sawiin MFASA Secretary Pu C. Lungmuanpuia hnen atangin report ngaihthlak a ni a; tun hnaia MFAS tling tharte Association member atan lawmluh nghal ni bawkin, MFASA Treasurer Pi Malsawmdawngliani’n lawmthu sawiin chawhma inkhawm hi a khar a ni.

Chawhnu Session-ah President Pu Vanlalsawma kaihhruaiin ro rel a ni a, thu rel tam takte zingah - Sawrkarin Mizoram pension (OPS) reforms chak takin kalpui rawh se tih te, Financial Management chungchangah workshop buatsaih ni rawh se tih te leh Audit training - C&AG/PAG ah neih ni rawh se tihte chu an thurel langsar zualte a ni.