Mizoram Finance Commission chu a vawi khatna atan vawiin chawhma khan an Chairman Pu Vanhela Pachuau, Chief Secretary Conference Room-ah an thukhawm a. Commission inrelbawl dan tur leh hmachhawp hrang hrang an sawiho a ni.

Mizoram Finance Commission hi September ni 30, 2011 atanga din tan a ni a. Commission mawhphurhna hrang hrang te zingah kum 5 lo awm tur chhunga state sorkar leh Village Council, Aizawl Municipal Council leh Autonomous District Council ten sum an insem tlan dan tur chungchanga rawtna siam te, VC/AMC/ADC te hnena sorkarin mawhphurhna (functions) a pek dan tur chungchang te leh local bodies chi hrang hrang ten chhiah eng ang nge an khawn theih tur chungchanga rawtna siam te a ni ang. Local bodies ten sum leh pai dinhmun tha zawk an neih theih dan tura rawtna siam leh chhiatrupna thlen thulh pawha local bodies te chu eng ang tanpuina nge sorkarin a pek tur ni ang tih te pawh Commission hian a ngaihtuah tel dawn a ni. Khaw tina sorkar hmasawnna hna kalpui mek te chu local bodies kaltlanga tha lehzuala vil a nih theih dan tur rawtna te pawh Commission hian a siam dawn a ni.

Mizoram Finance Commission member te chu :

Pu Vanhela Pachuau, Chief Secretary - Chairman

Pu Lalthansanga, Finance Secretary - Member Secretary

Pu F. Vanlalruata, Addl. Secy. (Finance) - Member

Pu Vanlalnghaka, Addl. Secy. (Finance) - Special Invitee

Dr. PC Lalawmpuia, Under Secy. (Finance) - Special Invitee an ni.

Mizoram Finance Commission chuan an mawhphurna hrang hrang an kenkawhnaah felfai leh tha zawka a kal theih nan mipuite hnen atangin rawtna siam turin a sawm nghe nghe a ni.