Vawiin khan I&PR Auditorium-ah Mizoram Fisheries Technical Service Association chuan Annual Conference 2014 an hmang a. Fisheries Department Minister Dr. B.D. Chakma chuan Khuallian niin he hun hi a hmanpui a, fuihna leh tan lak tul a tih ah te thuchah a sawi a ni.

MFTSA President Pu Lalrochhara kaihhruai Conference hawnna inkhawm ah chuan Fisheries Minister chuan Mizoram chhung lui hrang hranga sangha awmsa te hi humhalh a tihpung ni theih se State pawn ah pawh thawnchhuah tham thar chhuah theih ni sela thil duhawm tak a ni a ti. Mizoram chhungah hian tualchhung sangha chi hrang 98 lai a awm thu sawiin Dr. Chakma chuan chung zinga 18 te chu ei tlak tling lo, sangha mawi leh mit la (ornamental) an tih hi a ni a ti a. Ei ral atana phai lam sangha lakluh chungchang sawiin heng ah hian a thianghlimna chungchangah fimkhur a tul a ni a ti. Zoram lui hrang hranga sangha te humhalh leh tihpung kawngah hian Forest Department nen thawhhona tha tak neih a tul thu te tûr, bomb leh hmanraw dang hmang a sangha man kan ching te pawh a khuahkhirhna dan khauh tak a kenkawh a mipuite nen pawh tang ho a tul a ni a ti bawk.

Vawiin Conference ah hian chawhnu lam ah rorelna hun hman a ni a, an thurel langsar zual zingah chuan Fisheries Department enkawl lai sangha dil hrang hrangah tualchhung sangha chi vulh leh tihpung dan ngaihtuah te ; Mizoram Fisheries Act 2002 chungchang bakah an service leh department chhung inrelbawlna kaihhnawih thil hrang hrang a tel a. Hruaitu thar thlanna hun an hmang bawk.