Vawiin khan Health Minister Pu Lal Thanzara chu a office-ah Apollo Group of Hospitals aiawh pahnih te chuan an hmu a, hriselna kawnga Apollo Hospitals in Mizoram a thawhpui duh thute an thlen. Health Minister hi Pu R. Lalrinawma, Health Secretary in a tawiawm a ni.

Apollo Hospitals aiawh te chuan Mizoram Sawrkar nen thawhduna tha tak an neih avangin Health Minister hi lawmthu an hrilh a. Super specialty hrang hrang – gastroenterology, urology, cardiology leh neurology ah te an doctor thiam, an Hospital tum vek a Mizoram rawn hruai chho a, free medical camp leh awareness programme te buatsaih an duh thu an sawi a. Health Minister chuan an ruahmanna chu tha tiin Health Department te rawn in he programme hi September velah neih tha a tih thu a hrilh a. Heng programme buatsaih an tum ah te hian Mizoram doctor ten nen thawhhona leh training dan kawng te pawh dap tha a tih thu Minister hian a sawi bawk.

Hei bakah hian Apollo Hospitals in India ram pumah lung natna venna kawnga programme an tan ‘Billion Hearts Beating Campaign’ chu Mizoram ah pawh tih an duh thu an sawi. Hetiang programme hi Hmarchhak ah chuan Sikkim leh Assam ah te an lo ti tawh a ni. Kumin September ni 6 leh 7 a khawvel huap International Patient Safety Congress, Kolkata-ah neih tura telpui ngei turin Health Minister hi an sawm bawk a ni.

Apollo Hospitals aiawh te hian Apollo Groups of Hospitals Chairman Dr. Prathap C. Reddy-a chanchin (biography) ziahna lehkhabu ‘Healer’ tih chu Health Minister hi an hlan a. He lehkhabu hi nimin Chief Minister Pu Lal Thanhawla an hmuh naah Chief Minister hi an hlan ve bawk a ni.