No.326/2021-2022
Aizawl the 29th Aprl, 2021: Kan hriat theuh angin Mizoram hmun hrang hrangah tunlaiin ramkang, tuihna tlem leh kangchat avangin harsatna kan tawk mek a. Tuihna tlem hi kumina ruahtui kan dawn mumal loh vang chu ni bawk mahse, mipuiten hun rei tak chhung tuihna siamtu ramngaw humhalh kawngah hma kan lak that tawk loh vang a ni a. Tin, kumin hian hmun hrang hrangah kangmei kan tichhuak nasa hle a; vawiin thlengin mi kuthleite avangin ram ala kang mek a ni. Mizoram Forest Service Association (MFSA) chuan ramngawte kan tihchereu avanga harsatna hrang hrang Mizo mipuiten kan tawh mek leh, ram tichereu lehzual tura ram kan la tikang fo chu pawi a ti hle a ni. Chutih rual chuan, hmun hrang hrang ramkang thelh leh veng tura thawkchhuak thin Village Council-te, YMA leh NGO dangte, Fire Emergency Services Department leh mipuite hnenah an inpekna hlu tak avangin MFSA chuan lawmthu a sawi bawk a ni.
MFSA chuan kan ram rohlu-ramngaw leh nungchate kan tichereu nasa lutuk hi pawi a ti takzet a. Kan ramngaw leh a chhunga nunna nei chi hrang hrang (biodiversity) awmte zinga engemawzat hi India ram state dang leh khawvel hmun dangte pawhin an neih ve lohte an ni a. A ram neitu Mizo mipuiten hlutna chang hre lova nasa taka tichereu a kan suasam laiin, State dang leh ramdang atanga lo kal ten zirbingna (research) neiin thiamna hlu tak tak min puakchhuah khalh mek a ni.
Mizoram tun huna kan harsatna tawh mek tuihna kangchat/tuihna tlem pawh hi luihnar leh luikam ramngaw kan tihchereu nasat vangte, leivung leh bawhhlawh kan paih nasat lutuk vangte a ni . Khawtinin kan tuikhur hnar ramngawte kan duat loh zel a, sawrkar pawhin luipui reserve-te a humhalh that loh chuan; mi tlem kutah heng kan ramngaw te hi lutin, tun aia nasa zawk tui harsatna hi hun reilote chhungin Mizoram mipuiten kan hmachhawn ngei dawn a ni.
Chuvangin sawrkar department hrang hrangte, NGO leh mipuiten ramngaw, nungcha leh kan luite humhalh turin rilru hmunkhatin ke pen ila, kan theihna zawn theuhah theihtawpin hma ila chhunzawm zel ang u. Zoram hi kan tu leh fa, tuchhuan lo awm zel turte tan chenna tlak ni turin kan thing leh mau, luituite renchem taka hmang chungin i humhalh zel ang u.
