No.325/2021-2022

Aizawl the 29^th April, 2021: Vawiin khan Deputy Chief Minister Pu Tawnluia hovin PHE Department hotute nen Video Conference kaltlangin tun hnaia tui harsatna chungchangah Chief Secretary Conference Hall-ah meeting an nei a. Meeting-ah hian district hrang hranga tui dinhmun leh harsatna an neih te ngaihthlak a ni bawk a ni. 

Deputy Chief Minister Pu Tawnluia chuan tun dinhmun diktak report atangin hmalak dan tur tul duang a nih tur thu a sawi a. Tui kang avangin thingtlang leh khawpuiah harsatna kan tawk mek a, khawkheng avangin harsatna tamtak kan neih karah kangmei nidanga chhuak ngailo te chhuakin, leilung hausakna kan chan nasa  a ni, a ti a. Tui hi a bik takin kan nunna atan a pawimawh em em a ni tih kan hria a, mamawh tam tak zingah tui erawh chu thlakna tur a awm lo a, sawrkara a mawhphurtu department hian theihtawp a chhuah chungin khuarelin khawkheng a rawn thlen takah chuan tui hna a lo tlem tial tial a, then phei chu a kangchat a ni tih kan hria a, dinhmun khirh tak hi mipui te pawhin min hriatthiampui a, ngaihtuahpui pawh kan ngai viau a ni, a ti a. Emergency Water Supply (EWS) pawh a tul anga bawhzui turin hmalak belh a ni ang tiin a sawi a ni.

Meeting-ah hian Aizawl-ah thal laiin mipuiin tui an harsa a ni tih hriat a ni tarlan a ni a, hemi dinhmun hi engvanga thleng nge tih chhui chianna-ah chuan December chawhnu lam krismas hma atangin thlasik a na hle mai a, mipuiin power supply kan mamawhna a lo pung hluai mai a, chumi a nih avang chuan krismas hma deuh atangin Aizawl tui pump na Luangmual atanga power supply kan lakna load shedding awmin, darkar 5 vel tui pump full capacity a pump-na tur power supply a awm ta lo a, tui pump a tlem chho tan ta a. February ni 23 thleng nitin tui litre nuai 24 a tlemin tui pump chho a ni a, hetih lai chhung hian diesel engine hmangin tui hi pump reng a ni a, amaherawhchu diesel pump hian electric power hmanga pump hi a tluk lo a, tui pump chhuah a lo tlem a, February ni 23-ah Luangmual transformer chhiain, P&E Department-in theihtawp chhuahin, March ni 13-ah siamthat a ni a, ni 19 chhungin nasa takin tui pump a kaihlak a, nitin litre nuai 37 in Aizawl khua a tui pek a tlak hniam belh ta a, nikhatah nuai 213 vel chauh ni 19 chhung hian pump theih a ni ta a ni. March ni 30 ah to te a lo haw a, thingzar tla in Luangmual atanga Aiduhmunzawl transmission line a ti chhe leh a, chumi chu siam that a nih hnuin tluang takin pump a ni a, April ni 4 leh ni 16 ah khan electric control panel chhiain chu chuan ni 2 tui pump a tikhaihlak tir leh a, chumi hnuah chuan April ni 7 ah Phase II lian ber electric motor bearing a kang a, ni 4 ngawt tui pump that leh theih a ni ta lo a. December thla chawhnu lam tanga April thla chhung zawng khan ni 27 chhung tui pump that theihloh ni belhkhawm a ni a, chumi a nih avangin Aizawl in tun thal hian tui sem lamah harsatna kan tawk a ni tih ngaihthlak a ni a. Tun inrinni kal taah khan Tlawng lui tui pump-na hmun te en a  ni a, tui discharge te en a ni a, April ni 24 ah khan 31.69 million litre chiah Tlawng lui ah a luang a, kum 2019 a tui luang tlem ber April ni 29 ah 70 million litre a ni a, kum 2020 a tlem ber tum chu April ni 1 a ni a, 65 million litre a ni tih tarlan a ni. April ni 26, 2021 khan Phase I tui pump hleihtheih a ni lo a, Serlui discharge hi nimin ni 28 khan teh a ni leh a, 1.8 million litre chauh a ni a, Phase I tui pump tur chuan eng tham mah a nilo a, tui tling tur pawh awm mang lo a ni a. Phase II wier-ah tui dawtna 3 hman a nih hian ware hi a kam ta a, April ni 25 khan 14.57 cm in a tla hniam a, ni 26 ah 16 cm in, ni 27 ah 22 cm in a tla hniam leh a, vawiin ni 29 zing dar 8 khan 26.75 cm Phase II wier tui hi a kam ta  a. Ruah a sur a, tui hna a pung chho a nih loh chuan Phase II double pumping leh Phase I single pumping tih loh chu Tlawng lui hian tun dinhmunah tui pump tur min pe thei hrih lo a ni tih tarlan a ni.