391/2023-2024

Lunglei the 10th May, 2023 - Vawiin khan Mizoram Governor Dr. Hari Babu Kambhampati chuan Lunglei a rawn tlawh. Governor leh amah zuitute hi chawhma dar 9:55 ah khan Kawmzawl helipad-ah rawn tumin Lunglei Bawrhsap Pi Ramdinliani, 2nd Battalion MAP Commandant Pu Saidingliana leh District official dangten anlo dawngsawng a. Kawmzawl helipad-ah hian 2nd Battalion MAP ten Guard of Honour an lo pe a ni. Lady Governor Dr Jayasree Kambhampati pawh alo tel a ni.

Mizoram Governor hian DC Office, Lunglei pan nghalin Lunglei District Head of Office-te, Bank Manager-te leh VC Association hruaitute meeting a neihpui nghal a ni.

Meeting-ah hian Lunglei Deputy Commissioner Pi Ramdinliani chuan Lunglei District chanchin, dinhmun leh Department hrang hrang hnuaia scheme leh project kalpui mek te sawifiahna hun presentation a nei a. 2nd Battalion MAP Commandant Pu Saidingliana pawhin Lunglei District-a dan leh thupek kenkawh chungchang leh invenhimna kalpui dan tlangpui sawifiahna hun a hmang bawk a. Inkawmhona hun pawh hman chhunzawm niin Head of Office thenkhat ten an Department hmalakna pawimawh leh harsatna neihte Governor hnenah hian anlo thlen a ni.

Mizoram Governor Dr. Hari Babu Kambhampati chuan sawrkar in mipuite tana scheme tha tak tak a siamte anih tur ang ngeia tangkai taka hman an nih theihnan Department-te chuan mipui pan hmasak nghak lova, a tul apianga pen chhuaka mipuite kan zirtir nasat a tul takzet a ni, a ti a. Mizoram hmun hrang hranga District mipui tam zawk ten Sawrkar Laipui Welfare Scheme tha tak tak, cheng tlem te kum khat atana pek a, cheng nuai tel hmuh theihna tur te an hre lo hle tih a hmu a; pawi a tih thu leh hengah te hian zirtirna kalpui nasat sual sauh a tul thu a sawi a. District ti hmasawn zel turin Bank ten mawhphurna pawimawh tak an nei a ni tiin, sawrkar laipui scheme hrang hrang- Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), Atal pension Yojana (APY), Pradhan Mantri MUDRA Yojana (PMMY) leh a dangte pawh mipui tam zawkin an hman tangkai theihnan theihtawp chhuah tura chahin heng scheme hnuaia Lunglei District Bank-te performance amah ngeiin alo vil chhunzawm zel tur thu a sawi a ni.

Sawrkar Laipui ruahman naa Lunglei District-a school tha tak tak din te - Jawahar Navodaya Vidyalaya (JNV), Eklavya Model Residential Schools (EMRS) leh Kendriya Vidyalaya ah te enrolment a tha tawk lo pawh pawi a tih thu sawiin, a bik takin thingtlang khua atanga zirlai tam zawk an luh theihnan Awareness Campaign neih a tul a ni, a ti bawk a. Lunglei District chhunga inbiakpawhna leh Internet Connectivity tha zawk a awm theihnan 4G Saturation project leh BharatNet Project kalpui mek ah te chak taka hma lo la chhunzawm zel tur leh harsatna an neih chuan a hnenah thlen hreh lo turin a chah a. Mizo zingah thalai lehkhathiam hna hmulo tam tak an tam thu leh an tan theihtawpa hmalak a tul thu sawiin DDU-GKY Scheme, Polytechnic leh ITI te pawhin training pek mai piah lamah an eizawnna ngaihven pui a, placement te buatsaih sak turin a chah a.

Head of Office-te leh Bank Manager kalkhawmte chu District ti hmasawn tura mawhphurhna fawng vuantute an nih angin an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel turin a chah a ni.

Pi Ramdinliani, Lunglei Bawrhsap report pek dan chuan tunah hian Lunglei District 4056.58 sq.Km a zauah hian mihring 1,35,315 vel an cheng mek a. Village Council 113 a awm a, Civil Sub Division 2, RD Block 4 a awm a, Assembly Constituency 6 a awm bawk a ni. Lunglei District-a hmasawnna hna pawimawhte – MGNREGS wage component hnuaia Sarovar Site 75 siam te, MzSRLM hnuaia SHG 1040 din te, DDU-GKY hnuaia mi 215 training pek te, Faina kawnga Lunglei District hnathawhte leh achievement-te, Pradhan Mantri Mudra Yojana hnuaiah 2022-23 chhunga loan cheng nuai 1849.24 mi 588 hnenah pek chhuah anih thu te, National Social Assistance Program-ah beneficiary 5630 an awm thu te, Pradhan Mantri Gram Sadak Yojana hnuaia kawng 14 siam zawh tawh niin 24 thawh mek anih thu te, 15th Finance Commission Rural Body Grant hnuaiah kum 2022-23 chhungin cheng nuai 1652.55 hu hna thawh anih thu te, JJM hnuaiah chhungkaw 14890 te hnenah Functional Household Tap Connection pek an nih thu te leh scheme pawimawh dangte report a pe a ni.

2nd Battalion MAP Commandant Pu Saidingliana report-ah Lunglei DEF hnuaiah Police Station pali awmin, Armed Police pakhat 2nd Bn MAP a awm a, dn leh thupek kenkawh kawngah harsatna liantham awm lovin kumin January ni 1 atanga May ni 10, 2023 thleng khan Lunglei District chhungah case 97 register tawh niin 36 chargesheet tawh a ni. In rawk leh thil inruk sak case tam berin kuminah 62 a awm tawh a ni.

Head of office-te meeting a neihpui zawhah hian Governor chuan kohhran hruaitute, NGO hruaitute, Pradhan Mantri MUDRA Yojana (PMMY) beneficiary-te, LMC Councillor-te leh political party-te inkawmhona hun a hmanpui a. Kohhran hruaitu, Tlawmngai pawl leh Political Party aiawhte hian Lunglei District-a an thil vei zawng leh hmasawn zelna tura hmalak tul an tih hrang hrang – Manipur buaina chungchang, Lunglei District tui harsatna, MZU Southern Campus din chungchang, Lunglei District atanga Indo-Bangladesh Border Trade kalpui, Regional Transport Authority din, Greater Lunglei Water Supply tih puitlin, Vocational Training Centre din chungchang te ziakin Mizoram Governor hnenah hian an thlen bawk a ni.

Governor hian 20 Bn BSF-te an Headquarter tlawhin, mi harsa insak tanpuina scheme PMAY (U) beneficiary te pahnih a hmunah a tlawh bawk a ni.

Governor lo zin pual hian Office of the Deputy Commissioner, Lunglei District chuan DC Bangla tualzawlah Cultural program an buatsaih a. Mizo Cultural Artist Association (MCAA) leh Mizoram Gorkha Youth Association (MGYA) te chuan hnam lam entirin Pi Lawmzuali Ngente a zai bawk a ni.

Governor leh amah zuitute hian naktuk chawhma ah Hnahthial District panin Lunglei an chhuahsan dawn a ni.