No.1789/2021-2022

Aizawl, the 11th August 2021: Vawiin tlai khan Brig(Dr) B.D. Mishra (Retd.), Arunachal Pradesh Governor ni mek chu rinawmna thu tiam tirin Governor Haribabu Kambhampati chawlh lak chhunga Mizoram Governor hna thawk lailawk turin Mizoram Governor 23-na atan lakluh a ni a. Hei hi Governor Haribabu Kambhampati chawlh chhung atana President of India in ruahmanna a rawn siam a ni.

Chief Justice of Gauhati High Court aiawhin Justice Michael Zothankhuma, Judge, Gauhati High Court chuan rinawmna thu tiam tirin Brig B.D Mishra (Retd.) chu Governor atan a la lut a. President of India in Brig B.D Mishra (Retd.), Mizoram Governor atana a rawn ruatna chu Pu Lalnunmawia Chuango, Chief Secretary chuan a chhiar chhuak a. Hemi hnu hian Upper Lawn, Raj Bhavan-ah Governor hi thla lak pui a ni. Aizawl khawpui huam chhungah inkhuahkhirhna kalpui a nih avangin Governor lakluhnaah hian mi tlem te chauh an tel a. Chief Minister Pu Zoramthanga , Deputy Chief Minister Pu Tawnluia, Speaker Shri Lalrinliana Sailo, Council of Minister te, Chief Secretary Pu Lalnunmawia Chuaungo, DGP Pu SBK Singh, Political Party aiawh hruaitu pakhat theuh, NGO lian deuh te aiawh hruaite pakhat zel te chiah an tel a ni.

Brig B.D Mishra (Retd.) hi Kathauta, Bhadohi District, United Provinces of British India(Tuna Uttar Pradesh)-ah a piang a. A nupui Neelam Mishra nen fapa pakhat leh fanu pakhat an nei a ni.

Brig B.D Mishra hi mi lehkhathiam tak a ni a; MA, Allahabad University, M.Sc, Madras University, L.L.B, University of Delhi leh PhD, Jiwaji University, Gwalior atangin degree a nei a ni. College of Combat, Mhow -ah kum 5 chhung Graduate leh Post Graduate te a zirtir thin a. India rama Defence college ngaihsan hlawh tak, Defence Serivices Staff College, Wellingto- ah te pawh a zirtir thin bawk a ni.

Kum 1961 December 17 khan Sipai Officer ni tanin kum 1995 July 31 khan a retired a. Sipai hotu huaisen leh hlawhtling tak a ni a, India ram tan indona hmunah te a hmatawngah awm awm tawh thin in - Sino-Indian War, Indo-Pakistani War 1965 leh Bangladesh Liberation War te khan India tan hmelma sipaite a lo hmachhawn tawh a ni. A service chhung hian duty leh operation pawimawh tak tak a hlen tawh a. Kum 1993 April 24 khan NSG(Black Cats) Commander niin Raja Sansi Airfield, Amritsar-ah Indian Airlines thlawhna Terrorist ten an hijacked atangin thlawhna chuang khualzin leh a thawktu mi 124 te chu an vaia nungdamin a lo chhanchhuak tawh bawk a ni.

Governor Brig(Dr.) BD Mishra (Retd.) chu vawiin tlai dar 2:30 khan Mizoram lo thlengin, Mualpui helipad-ah Chief Minister Pu Zoramthanga leh Health & Family Welfare Minister Dr. R. Lalthangliana ten an lo hmuak a. A hmunah hian chibai bukna (guard of honour) pek a ni a. Mualpui atang hian Raj Bhavan pan in, Deputy Chief Minister Pu Tawnluia leh Agriculture Minister Pu C. Lalrinsanga ten an lo hmuak. Mualpuia governor hmuahnaah hian Chief Secretary Pu Lalnunmawia Chuaungo, DGP Pu S.B.K. Singh, Secretary to Governor Pu V. Lalsangliana, Aizawl DC Dr. Lalhriatzuali Ralte leh officer dangte telin, Addl. Chief Secretary Pu JC Ramthanga chu Raj Bhavan a hmuahnaah a tel bawk a ni.