No.1788/2021-2022

Vairengte, 11th August 2021: Vawiin chawhma khan Power & Electricity Department Minister Pu R.Lalzirliana chuan ramri hnaih khuate tih hmasawn nan leh ramri hrul a Police duty-nate thawmthat dan tur a hmuna enin Buarchep, Phainuam,  Saihapui V leh Vairengtea Police duty-te leh khawtlang hruaitute a kawm a. Pu Lalrintluanga Sailo, Dy. Chief Whip, Pu H.Lalzirliana, MLA, Pu Lalrinsanga Ralte, Serlui bialtu MLA leh P&E Department hotuten Minister hi an tawiawm a, Pu Lalbiakthanga Khiangte, DIG(NR), Pu Vanlalfaka Ralte, SP Kolasib te an tel bawk a ni.


Pu R.Lalzirliana, Power & Electricity Department Minister chuan July ni 26, 2021-a, Vairengte thil thleng avanga Assam Police 7 laiin nunna an chan chu pawi a tih rualin he thil thleng hi Assam lam cho chhuah a nih thu leh hetiang zawnga hmalakna hi  awm tawh lo se a duh thu a sawi. He thil thlen hnua kan chak lakna ber NH 306 dang chat a, riltama min hrek hlum theih beisei a an hmalak dan leh  lirthei tangkhangten mipui kut an tawrh chungchang sawi langin Pu R.Lalzirliana chuan Assam CM Himanta Biswas Sarma chu Mizo mipuite leh an chhehvel state-ten a chhe zawnga an hriatreng lohna turin awm se a duhsak thu a sawi bawk a ni.
P&E Minister chuan ramri hrula khua awmte tihhmasawn chu Mizoram Sawrkarin a ngaih pawimawh thu sawiin hmasawnna hmahruai ni turin kawlphetha pek chhuahna changtlung zawk a thawmțhat tum a nih thu leh hmun țhenkhatah phei chuan hna kalpui țan tawh a nih thu a sawi a. Buarchep, Phainuama leilet neituten țangkai taka an hman turin leh Police duty-na hmuna eng chhit theihna turin Chief Minister ruahmannain 25 KVA transformer bun thuai tum a nih thu a sawi a, ban phun hna pawh kalpui țan a nih tawh thu a sawi. Minister chuan tun hnaia ramria thil thleng avangin ramri venhim kawnga inpuahchah chhunzawm a pawimawh lehzual thu a sawi a, Mizoram Police-te huaisenna chu fakawm a tih thu leh thlamuanthlak a tih thu a sawi bawk a ni. Pu R.Lalzirliana chuan ramri hnaiha khua awmte, ramri venghim tura an inpekna chu ropui a tih thu a sawi a, ramri hnaih khua tihhmasawn chu ramri venhimna kawng pawimawh tak a nih angin Mizoram sawrkar pawhin a ngaih pawimawh ber pakhat a nih thu a sawi a ni.


P&E Minister hian Buarchepa police duty-te tan chawhmeh leina tur Rs. 40,000 a pe a, mi inphalte kaltlangin khawtlang hman turin PA System a hlan bawk a, kawlphetha țha taka pawh luh a nih hma a eng chhit lailawk nan Solar Lighting Unit 20 a pe bawk a ni. Saihapui V khawtlang leh Police duty-te chawhmeh man tur Rs. 30,000 a hlan a, Saihapui V branch YMA-ten a țul apianga an hman atan Rs. 6,000 a hlan nghal a, Pu Lalrinsanga Ralte, MLA chuan PA system a hlan ve bawk a ni. Pu R.Lalzirliana hian Vairengte Joint VC hnenah leh Vairengte Police duty-ten a țul apianga an hman atan Rs.10,000 ve ve a hlan bawk a ni.

Attachment

  • Loading attachment...