Mizoram Governor Pu Kummanam Rajasekharan hovin nimin September ni 18, 2018 (Thawhlehni) chawhnu khan Raj Bhawan Durbar Hall-ah Mizoram chhunga connectivity, a bik takin internet connectivity chungchang meeting pawimawh tak neih a ni a. He meeting Commissioner & Secretary, Information & Communication Technology Pu Vanlalchhuanga kaihhruaiah hian Secretary to Govermor Pu K.Lalthawmmawia bakah DDG, NELSA, Dept of Telecom; General Manager BSNL, Mizoram; Dy. General Manager, RailTel leh CEO Airtel, NE & Assam te an tel bawk.

Mizoram Governor chuan Mizoram chhungah hmasawnna than mawhbawk ber chu inkalpawhna leh inbiakpawhna chhia (poor connectivity) hi a ni a, tun dinhmunah sorkar laipui bultuma telecom leh internet connectivity project hrang hrang kalpui mekah eng chen nge hlawhtlinna an nei tawh leh harsatnate an tawhte sutkian dan tur ngaihtuahho tura meeting hi koh a ni, a ti. Heng project kaihhnawih department hrang hrangte inkarah inhriattawnna leh thawhhona thra leh langtlang tak neih a tul thu leh hna kal lai mekte chu vil (monitor) that a pawimawh hle thu Larsap chuan a sawi bawk a ni. Mizoram Governor a nihna angin state chhunga hmasawnna tur ruahmanna hrang hrang kalpui mekte chu zirchian a duh thu sawiin Pu Kummanam Rajasekharan chuan thla 3 dan velah Connectivity chungchangah review meeting ko ziah turin a hrilh bawk.

Meeting-ah hian service provider hrang hrang BSNL, Airtel, RailTel bakah State Bank of India ten tun dinhmuna an hmalakna tawhte leh an hmalakna kal mek hrang hrangte report an pe theuh a. Sorkar laipui project kalpui mek hnuaiah Mizoram district 8 bakah RD Block leh Village (khua) thlengin thlunzawm vek tum a nih thu an sawi a, kawng tha lo te, leimin leh thin te, khawchhiat zin avangtein hnathawh chak a har thu an sawi a. Tunah hian Power & Electricity Department nen optic fibre thlun nan an electric bante hmang tangkai theih dan tur an ngaihtuahho mek tih thu meeting-ah an tarlang bawk.

 

 

Attachment

  • Loading attachment...