Special Plan Assistance (SPA) sum cheng nuai 125.55 senga sak Rabung Primary Health Centre Building thar chu nimin chawhnu khan Champhai North bialtu MLA  Pu TT Zothansanga'n ribbon chepchatin a hawng.

Pu TT Zothansanga chuan Rabung leh a chhehvel khuate chhawr tur PHC Building tha tak sak a ni chu lawmawm a tih thu leh a puitlin theihna tura sulsutute a fak a. Rabung khuaah tunhnai maia 33 KV Sub-Station hawn anih hnu reiloteah PHC Building thar hawn ani leh chu  thil lawmawm leh chhinchhiah tlak tak anih thu a sawi a. Khawvel changkang zelah hriselna ngaih pawimawh a tul thu sawiin, hmanni lawka hawn tak MIMER chu hriselna lam panna rahbi thar anih thu leh Mizoram ngeia kum tin Doctor za rual vel zir chhuah theihna anih dawn avangin Doctor tlakchhamna a phuhruk theih dawn thu a sawi a. Ram hmasawnna zawh kawnga kawlphetha pawimawh zia sawrkarin a hria a, Tuirial Hydel Project pawh peihfela hawn a lo ni tawh bawk a ni, a ti a. Sawrkar flagship programme NLUP hmangin mi tam takin eizawnna ngelnghet an neih phah a, hemi thlawpa chhunzawm zelna turin NEDP pawh duan niin kalpui a ni, a ti.

Champhai North bialtu MLA chuan a bial chhung hmasawnna tura theihtawp a chhuah thin thu sawiin, bial mipuite chu tawiawma thurawn pe thin turin a sawm a. A bial chhunga inkalpawhna kawng chungchang sawiin, Hnahlan leh Tualcheng inkar laih tawh black top tura contractor thlan tawh niin hna tan thuai tum anih thu te, Tualcheng leh Rabung inkar kawng pawh thal laia kaltlang theih tura siam anih thu a sawi a. Rabung leh Aiduzawl inkar siam hna pawh contractor thlanfel tawh hna tan mai  tur niin, Aiduzawl leh Hliappui inkar chu NABARD sum hmanga siam tuma DPR peihfel anih tawh thu a sawi a. Rabung khaw Bung leh a chhehvel cheinan cheng nuai sawm hmuh anih tur thu leh YMA hmalaknaa cheithat tum a ni, a ti a. Khuallian chuan PHC Building hawn thar chu Rabung leh a chhehvel khuaten tangkai taka an hman ngei theihna turin duhsakna a hlan a ni.

Hawnna programme hi Dr.Vanlalnghaki, Chief Medical Officer Champhai District chuan a kaihruai a. Pu R. Lalramliana, SDO, Project Sub-Division, PWD Champhaiin Technical report a pe a. Pu H. Lalawmmeka, President, Village Council Rabung-in thu a sawi a. Dr. C. Lalnunpuia, MO, Rabung PHC-in lawmthu sawina neiin hun a khar a. Programme zawh hnu hian PHC Building thar lawmna ruai kil nghal a ni.

Vawiina hawn tak Rabung PHC Building thar hi June Ni 30, 2016 a sak tan niin January Ni 6, 2018 khan sak zawh a ni a.  Square metre 340 a zau hmun awhin a ban, chhuat leh ruangam hi RCC veka sak a ni a. PHC Building tharah hian Delivery room, Minor OT,  Consultation room, Medical store & Dispensary room, Sterilisation, Laboratory, Dark room, X-ray room, Casualty room, Nurse Station, Female & Male ward bakah toilet-te a awm a ni.