Vawiin khan Pi Vanlalawmpuii Chawngthu, Minister Cooperation etc chuan Mamit District mipui a mamawh a piangte hman turin Assistant Registrar, Cooperative Societies (ARCS) Office thar, Mamit Field vengah a hawng.

Hawnna inkhawm I&PR Conference Hall-a neihah Pi Vanlalawmpuii chuan Mamit District mipuite mamawhna hria-a Office tangkai tak tur hawn a nih theih nana hmalatu Mizoram Sawrkar chungah leh Bialtu MLA chungah lawmthu a sawi a, tun dinhmunah Mamit chu Aizawl West leh Kolasib atanga kawp anih avang leh Office dawrtu mi harsa zawkte mamawhna chhawk anih theih nana hawn a ni ta chu hmasawnna lawmawm tak a ni a ti. Office staff te chu dawrtu mipuite tana dawr nuam tak nih tum tur leh an tih theih bak a awm a nih pawha tawngkam hawihawm taka thlah thin turin a chah a ni. Sorkar hnathawkte chu kan hlawh phu tawka thawh chu kan tih ngei ngei tur, kan mawhphurhna a ni a ti bawk.

Ram hmasawnna leh rorelna dik kengkawha, sorkar tha siam turin kan theihna zawn theuhah tangkaina kan nei a ni tiin Mipuite chu sawrkar khalh ngil tura kan pawimawhna kan hriat a pawimawh thu a sawi a, kan ram kan hnam tana theihtawpchhuaha tang tlang turin kalkhawm mipuite a sawm a ni.

Mamit District chu hmasawnna-in a paltlang nasa em em a, tun hnai maia Sawrkar Office pawimawh tak tak hawn a ni chho ta chu lawmawm a tih thu a sawi bawk. Faina kawng-ah Mamit khawpuiin hma a lakna chu chhunzawm zel a, District khawpui fai tak, an nihna chu India ram anga inelna-ah pawh lawmman la thei tura tang chhunzawm turin a sawm bawk a ni.

Assistant Registrar, Cooperative Societies, Mamit-ah hian thawktu   ARCS, JRCS, UDC, LDC, Gr-IV an vaiin mi panga an awm a ni. Office Building hi Mamit Field veng-ah PC Lalbiakdika in luah hawh rih a ni. 

ARCS Office hawn thar pual inkhawm hi Pu B. Lalhmingthanga, Secretary, Govt of Mizoram Cooperation Department chuan kaihruaiin Mamit District tana Office thar,  Cooperation in a thawh ber  chu Department dangte leh Society-te nen tang tlanga mipuite ei leh bara an intodelh nana tanpui a nih thu a sawi a, Lo neih lamah leh sumdawnnaahte Mizoram-ah Society changtlung tak tak din a nih tawh thu a sawi a, Champhai Town Multipurpose Cooperation Society chu tunhnaia Society thangduang tak a nih thu a sawi a. Pu Vanlalngaihsaka, Registrar, Cooperative Societies chuan lawmthu sawina a nei bawk.

He hunah hian Mamit khawpui chhunga Sawrkar Department aiawh, tlawmngai pawl hrang hrang aiawh khawtlang hruaitu leh thutharthehdarhtute an tel a ni.

Attachment

  • Loading attachment...