Kar hmasa March ni 9-10, 2017 chhunga Indian Chamber of Commerce bultuma New Delhi-a neih zawh tak ‘11th North East Business Summit’ kharna inkhawmah Mizoram Governor Lt Gen Nirbhay Sharma, PVSM, UYSM, AVSM, VSM (Rtd) chuan thu sawiin Mizoram hmasawnna tura hmalakna tur pawimawh engemawzat a tarlang. 

Indian Chamber of Commerce President Pu Aditya Agarwal kaihhruai Summit kharna inkhawmah Mizoram Governor chuan Asia khawmual chhungah India-in pawimawhna a neih chho zel hunah hian a bik takin India hmarchhak bial tihchangtlun dan tur ngaihtuah hova Summit buatsaih a nih chu a lawmawm hle a ni, a ti a. Hmarchhak bialah kawng hrang hrangin hna a lo thawh tawhnate sawilangin Pu Nirbhay Sharma chuan he bial hian rampum ngaihtuahin a ram awh zawng chu 8% niin a chhunga chengte chu rampum mihring zaa 4% chauh ni mahse he bial hi leilung hausaknain a khat bakah a mihring chengte chu taima tak leh ziak leh chhiar lamah an sang hle thung an ni, a ti. Mizoram chuan ram 2 - Myanmar leh Bangladesh bakah state 3 - Manipur, Tripura leh Assam te nen ramri a intawm a, boruak, sik leh sa duhthusama nuam leh state ralmuang tak a ni tih a tarlang a. Mizoram chu ‘outpost’ ang leka thlir a nih thin chu tunah sorkar laipuiin ‘Look/Act East Policy’ chak taka a kalpui hnuin ‘Gateway to Southeast Asia’ angin a ngaih hial thei tawh a, hemi atan hian Mizoram state chu kawng hrang hrangin chhawmdawla tihchangtlun a tul takzet a ni, a ti bawk. Mizoram chu foreign ram 2 te bakah a thenawm state-te nena inkalpawhna tha tak a neih chu ngaih pawimawh hmasak a tul a, hei hian sumdawnna liantham zawk a siam mai bakah he biala cheng mihringte karah inpawhna tha zawk a siam thei dawn a ni, a ti. 

Thu a sawizelnaah Larsap chuan Mizoram leilung hausakna hmanthiam chuan ramhmul damdawi, mau, organi farming, tea leh rubber bakah zinmite hipna turin a chei thei a ni, a ti. Sorkar laipui chuan hmarchhak bial hmasawnna turin theihtawp a chhuah mek a, National Skill Development Council hmalaknain kutthemthiam thil inzirtir leh kuthnathawk mite hamthatna tur ngaihtuah mek a ni zel a; chumi rual chuan ramchhunga sumdawng (investros & business houses) lian te pawhin he bialah hmalakna lian tham rawn la tura a duh thu a sawi bawk. Mizoram Industrial Policy 2012 hnuaiah Foreign Direct Investment (FDI) nena thawhhona tur ruahman a ni a, state leh ram pawn atanga cheng vaibelchhe 5 chunglam invest duhte tan State sorkar chu engtiklai pawhin a inhawng reng a; hemi atan hian Mizoram Public Investment Board chu din tawh niin pawn lam atanga investment siam turte chu an lo enfiah a, sorkarin a pawm chuan an sumdawnna turin ram pawh hman hawh tir hial phal a nih thu a tarlangin NE Business Summit chhimtu zawng zawngte chu Mizoram-ah investment rawn nei ngei turin a sawm.

Attachment

  • Loading attachment...