Vawiin chawhma dar 10:30 khan Seventh Legislative Assembly of Mizoram Session vawi 12-na chu tan ni a. Session tannaah hian Mizoram Governor Lt Gen. Nirbhay Sharma, PVSM, UYSM, AVSM, VSM (Retd.) chuan House-ah  thu sawiin sawkar kum liam ta chhunga Mizorama hmasawnna leh hmalakna hrang hramg a tarlang. 

Mizoram Governor Lt Gen. Nirbhay Sharma, PVSM, UYSM, AVSM, VSM (Retd.) chuan Speaker leh MizoramLegislative Assembly Member-te chu chibai a buk hmasa a, Mizoram state-ah ralmuanna bakah sum leh paia intodelhna leh khawtlang hmasawnna awm zel theih nan Mizo mipuite duhsakna a hlan a. Sorkar hmalakna pawimawh tak NLUP avangin buh thar zat a pun mai bakah tlangram loneih aiin lo nghet nei uar a ni ta deuh deuh chu a lawmawm a tih thu a sawi. State chhungah ei leh bar hniarhnang tak a awm theih nan National Food Security Mission bakah sorkar laipui Scheme hrang hrang chak taka kalpui mek a ni a; thei leh thlai thar lakkhawm awlsam nan Horticulture Link Road engemawzat siam a ni mek bawk a. Sericulture hnuaiah Integrated Muga Silk Development Project bakah Lunglei leh Champhai district-ah Mulberry Project leh Soil & Water Conservation hnuaiah district hrang hrangah Rubber Plantation leh Nurseries te buatsaih mek a ni bawk. Commerce & Industries Dept hmalaknain Agriculture Marketing Infrastructure (Lunglei), Apparel & Garment Making Centre (IGC Luangmual), Skill Development Center (Lunglei) leh Zuangtui-a Industrial Estate tihchangtlun hna kalpui mek a ni bawk tih a a tarlang. 

Mizoram Larsap chuan India leh Myanmar sorkar MoU zulzuiin Rih-Tiddim Road chu sial mek niin Zokhawthar kaltlanga insumdawn tawnna atan hmasawnna a thlen ngei beisei a ni a, dan lova thil lakluh leh thawnchhuah (illegal trade) hrek nan helai hmunah venhimna (security) pawh tihchangtlung a ni ang, a ti. Thing leh mau tihchereu leh boruak, sik leh sa inthlak danglam chak lutuk ven nan hmalakna hrang hrang sorkar chuan a kalpui reng a, DoNER Ministry hmalaknain Mizoram-ah pawh GIZ nen tangkawpin Project lian tak kalpui tan a ni tawh a. NABARD tanpuina hmangin Mizor Irrigation chuan project thar 5 an kalpui mek bakah Mizoram sorkar leh Japan International Cooperation Agency (JICA) tangkawpin Sustainable Agriculture & Irrigation Development Project nikumah tan a ni tawh bawk. 

Sports & Youth Services hmalaknain Multipurpose Sports Complex (Vaivakawn), Recreation Centre-cum-Amalgamated Office Complex (New Sectt Complex), Multipurpose Indorrdoor Hall (Sihphir), R.Dengthuama Multipurpose Indoor Stadium (Mualpui) te thawh a ni a. Football lama Mizo infiammite hlawhtlinna piah lamah Rio Olympics-ah H.Lalruatfeli chu India Women’s Hockey Team-ah a tel bakah NCC Cadet Lalrintluangi chuan Mt.Everest a lawnchhuak bawk a ni. Social Welfare Department chuan NGO 44 hnenah tnapuina chi hrang hrang a pek bakah hmeichhiate hamthatna tur Girls Hostel leh Training Centre te an hawng bawk. Tourism Department chuan Thenzawl, South Zote leh Reiek-ah ‘Integrated Development of New Eco-Tourism a rualin an hawng a, Bung Bangla, Aizawl-ah State Institute of Hotel Management sak a ni mek bawk.

Falkawn-a ‘Zokhua’ chu 13th Finance Commission tanpuinain thawmthat a ni a, Beraw Tlang-a ‘Tagore Cultural Complex’ sak hna pawh tan thuai beisei a ni. Art & Culture hmalakna zinga tarlante chu  State Central Library-Extension Building te, Kolsaib-a District Library, Lunglei-a Cultural Heritage Centre leh Mizoram State Archives digitilisation te bakah geographical indicatication leh patenting of Mizo puan te a tel a. Champhai District-a Vangchhia khuaa Mizo pipute sulhnute chu Archaeological Survey of India hmalaknain enfiah a ni a, carbon dating hmanga an hmuhchhuah chu heng pipute sulhnute hi 1500 AD-a mi an ni. 

AH&Vety Department hnuaiah Epidemiological Centre (Khatla), Integrated Veterinary & Animal Husbandry TRaining Institute (Lungpuizawl, Lunglei), Animal Feed Plant (Ramrikawn), Piglet Multiplication Farm (Thingsulthliah), Liquid Nitrogen Palnt (Selesih) leh Calf Rearing Farm (Mampui, Lawngtlai) siam mek a ni a. Food, Civil Supplies & Consumer’s Affairs chuan computerisation of Public Distribution System an kalpui mek bakah web portal an hawng tawh a. LPG lamah mipuite harsatna hriain sorkar chuan Mualkhang Bottling Plant tihchangtlun a, gas cylinder khawih chingpen thinte dapchhuah nan Enforcement Squad din a ni bawk. 

Mizoram chu ramchhunga state fai ber a nih theih nan sorkar chuan chak takin hma a la mek a, hemi atan Mission 5 tan tawh niin mipuiten 24x7 tui thianghlim an dawn theihna tur leh  tui leh bawlhhlawh sawngbawlna tur thawh mek a ni bawk. Aizawl Municpal Corporation-in Property tax a khawn atanga zaa 80% chu khawtlang hmasawnna atan hman a ni ang a; Aizawl, Champhai leh Lunglei khawpuite chu ODF-ah puan an nih tawh bakah Aizawl chu ‘Littering Free City’ ah puan a ni tawh bawk. 

DoNER tanpuinain East Lungdar leh Khawbung-ah Mini Sports Complex sak a ni dawn a; NEC tanpuinain Ngopa-ah ‘Flood Control & Irrigation of Potential Agricutural Areas’ project tan a nih bakah ChhuanchhuahnaKhawpui-ah Aloe Vera chinna hmunpui siam a ni bawk. Sorkar hmalakna dang IWMP hnuaiah 14,183 hectare-a zau ram chu tui pek a ni tawh a, NRLM hnuaiah Self Help Group 741 din tawh ni bawk a, SAGY hnuaia Khawlailung leh Chhiatlang te chu Model Village ah puan an ni bawk. 

Kum 2016-17 chhungin PWD hmalakna hnuaiah kawngpui siamthat hna 16 thawh zawh a ni a, 58 erawh thawh mek a ni a; lei (bridge) 3 sak zawh a ni bawk. Kaladan Multi Modal Transit Transport Project hnuaiah kawngpui siam hna chu chak taka kalpui a nih mek bakah helipad 10 sak hna thah mek a ni bawk. PHE Department hmalaknain khaw 11 ah tui thianghlim in tur pek thar a ni a, Kelkang Water Supply Scheme chu zahfel a nih tawh bakah Aizawl WSS (Part A) chu nikum August thla atangin thawh tan a ni. Power & Electricity Department hnuaiah Tlawva HEP (5MW), Kawlbem HEP (4MW), Tuiriza leh Tuiching HEP (0.20MW) te leh NEEPCO hmalakna Tuirial HEP (60MW) pawh chu 2017-2018 chhungin thawh zawhfel beisei a ni a. Heng bakah hian power project 2, Tuivai HEP (210 MW) leh Tuirini HEP (24MW) chu thawh tan theih thuai beisei a ni bawk. 

Health & Family Welfare Deartment chuan mipuite hriselna lamah nasa taka hma la zelin Falkawn-a State Referral Hospital chu Mizoram Institute of Medical Education & Research ah tihchangtlun chho tum a ni a. MCON Nurse Hostel, Falkawn chu sak zawh a nih bakah Mizoram State Cancer Institute tih changtlun, Aizawl Civil Hospital-a Medical Library leh District Hospital zawng zawngah Mediacl Waster Mangement System dah thar hna chu kalpui mek a ni. Thenzawl-a khum 50 awmna AYUSH Hospital nikuma hawn tak chu hmarchhak biala hmasa ber a nih thu tarlangin larsap chuan AYUSH damdawi quality enfiahna laboratory pawh Zemabawk-ah din a ni tawh a ni, a ti. 

Mizoram sorkar-a Information Communication Technology Department chuan Smart Governance lamah ‘Skoch Award 2016’ leh ‘Skoch Platinum Award 2016’ a dawng chu thil lawmawm tak a ni tiin Pu Nirbhay Sharma chuan Aizawl khawpui leh District khawpui tinah internet connectivity chak zawk awm theih nan hmalak a ni bawk tih a tarlang a. Zirna lamah hmasawnna tam tak hmuh tur zingah Chhingchhipa-a Sainik School chu kumin academic session atanga tan theih a nih chu a lawmawm takzet a. Education Department hmalakna zingah Integrated Evaluation System for Secondary Stage te, Total Information on Schools & Teachers (TIST) te, Primary School tan Mid-Day Meal Scheme te, hostel, school leh office building thar sak te chu hmalakna langsar zual a ni bawk. Higher & Technical Education Department hnuaiah Champhai leh Kolasib-ah Polytechnic thar tur sak zawh ni tawhin Lawngtlai, Saiha leh Mamit-ah Polytechnic building tur sak a ni mek a. Heng bakah state pumah Hindi tawng zirtirna lamah nasa takin hmalak chho a ni bawk. 

Larsap chuan Mizoram chu state ralmuang tak a nih angin state sorkar leh HPC(D) te inbiakna kalpui chho zel a ni a, hun reiloteah an inbiak fel theih a beiseiawm hle a ni, a ti a. Mizoram Police chuan ralthuam engemawzat bakah pawisa lem, rangkachak leh ruihlo tam tak an man bakah Aizawl City Surveillance Project leh Forensic Science Laboratory chak takin an kalpui mek a ni. Fire & Emergency Services chuan Mamit, Serchhip leh Kolasib-ah Fire Station-cum-Staff Quarters sak hna te thawh zawh a ni tep tawh bakah District Jail thar 2 sak leh thawktu tur Home Guard 48 lak a ni bawk. Kum kalta chhung khan Mizo thalai 182 laiin Armed Forces-ah hna hmuin hei aia tam Mizo thalaiten sipaiah hna an hmuh theihna turin tanlak a ni bawk. 

Judicial lamah New Secretariat Complex-ah Aizawl District Court leh High Court building tur sak a ni dawn a; Lokayukta nultan theih nan chak takin hmalak a ni bawk. Rampum rualin Mizoramah pawh 1st July, 2017 atangin Goods & Services Tax hman tan a ni ang a, The Mizoram Entry Tax Act 2015 chu April 2016 atang khan hman tan a ni tawh a. Kum 2016-17 chhungin Taxation Department-ah chhiah chi hrang hrang cheng vaibelchhe 273.11 a tlingkhawm hman a ni. 

Lai, Mara leh Chakma Autonomous District Council te tan cheng nuai 6202.52 (Plan) leh cheng nuai 17228.90 (Non-Plan) pek a ni a. Heng ADC 3 huamchhunga hmasawnna kalpui mek project leh scheme vil tur State Level Committtee and District Council Level Monitoring & Review Committee te din a ni bakah zirna leh skill development lamah tan lakpui mek an ni bawk. 

Sorkar hmalakna New Economic Development Policy (NEDP) chak zawka kalpui a nih theih nan Committee chhawng 3 siam a ni a, heng hian NEDP hnuaiah hmalakna hrang hrang - Agriculture & Allied Sector, Commerce & Industry Sector, Infrastructure Development, Services Sector, Operation & Maintenance, Policy Reform Agenda leh Special Scheme/Projects an enpui dawn a ni. Economis & Statistics Department chuan Mizoram puma BPL Baseline Survey an nei zo tawh a; Science & Technology Department chuan Mizoram Science Centre hmunah ‘Innovation Hub’ an sa zo tep tawh bawk. Mizoram Bio-Resource Centre pawh kumin February ni 17 khan hawn a ni tawh nghe nghe. 

Mizoram sorkar hnathawkte hamthatna ngaihtuah chungin Dearness Allowance vawi 3 pun a nih bakah Pensionerte tan Dearness Allowance pawh ennawn leh a ni a. Sorkar PSU 3 - ZENICS, ZOHANCO leh MAMCO - te chu tihtawp niin MIFCO leh ZIDCO te erawh thawmthata tihchangtlun nan hmalak a ni thung. 

Information & Public Department chuan sorkar hmalakna leh programme hrang hrang mipuite hnenah a zau thei ang bera puanzar a nih theih nan chak takin hma a la zel a; kartin chhuak ‘Mizoram Hmasawnna Lamtlunang’ chu DDK leh cable TV ah te pekchhuah thin a ni a.Mizoram chhunga chanchinbumite bakah lemziak thiamte leh film lama mithiamte hamthatna tur ruahmanna hrang hrang a kalpui mek bawk. 

Land Revenue & Settlement Department chuan nikum chhungin 524 House Pass, 256 Land Settlement Certificate, 494 Land Lease Certificate leh Agricultural Land LSC 13 a pe chhuak a. Sorkarin skill development lama a hmalakna zingah Craftsmen Training, career Guidance, Modular Employment Skill Course bakah UPSC leh SSC Coaching te a kalpui mek bawk a; revised Minimum Rate of Wages pawh nikum 1st April atangin hman tan a ni. 

Mizoram Governor chuan a thusawi khar nan Mizoramah hmasawnna tluang leh chak taka kalpui a nih theih nan sorkar leh mipuiten theihtawp an chhuah a pawimawh a ni tiin mipuite thlantlin sorkar chuan dik tak leh langtlang taka thawk tur a ni tih hre reng turin leh mipuite pawhin sorkar hmalakna hrang hrang theihtawpa an thlawp zel a beisei thu a sawi a. Mizoram chu state entawntlak leh intodelh a nih theih zel nan duhsakna a hlan a ni. 

For full version of Hon’ble Governor’s Speech kindly see link dipr.mizoram.gov.in/speeches