LADC-a Executive Member thenkhat an ban avanga Governor-in LADC Executive Committee a suspend rih avangin vawiin khan Lawngtlai DC charge la mek tu Pu H.Dolianbuaia MCS chuan Governor thupek angin LADC Caretaker charge a la a, CEM Conference Hall-ah LADC kal zel dan tur sawipuiin officer-te a kawm.

Pu H. Dolianbuaia hi LADC Executive Secretary Pu H.Lalramenga leh LADC hnuaia department hrang hrang hotu lute'n an lo dawngsawng a. Pu H.Dolianbuaia chuan LADC sawrkarah hriat lawk loh harsatna lo thleng mah se, a hna thawh chu a buai ve mai a rem lo va; sawrkar hna thawkte chu mipuite hamthat nana thawk an nih avangin LADC pawh tluang taka a kal zel a tul a ni tiin, chumi atana thawh hopuiah leh amah finchhuah turin District Council-a Head of Department kal khawmte chu a sawm a. Hna thawh ho zel dan tur an sawi ho nghal.

He hunah hian LADC sawrkara buainain mipui himna tiderthawng thei boruak muanawm lo a thlen loh nana hma lak dan tur te sawi ho a ni a. Chuti ang boruak a la thlen loh thu leh a thlen a rinawm loh thu ngaihthlak niin, thil thleng palh thei veng tura Police duty erawh indah tho a that thu sawi a ni a. LADC hnuaia hna kal mekte a buai loh nan Caretaker chuan ama thuneihna chinah tluang takin hna thawk zel se, tih a ni.

Pu H. Dolianbuaia hi SDO(Sadar) Pu V.Laldinsanga MCS, SDPO Pu Saidingliana Sailo MPS leh DIPRO Pu C.Lalhruaitluanga MIS te'n an tawiawm a ni.