Nimin khan Govt Lawngtlai College leh Mizoram Science, Technology & Innovation Council (MISTIC) te tang kawp chuan Govt Lawngtlai College Hall-ah 'Intellectual Property Rights and Grass-Root Innovation' tih thupui hmangin workshop an buatsaih.

He hun hi Govt Lawngtlai College Principal Pu T. Thangthuama chuan a kaihruai a. Khawvel thang mekah eng kim maiin hma a sawn a, zirlaite pawh khawvel ruala hmasawn tura an tlan ve a ngai a ni tiin, he'ng hmasawnna lo thleng hi hre fiah tura kan zir peih a ngai a ni, a ti.

Workshop-ah hian MISTIC-a Scientific Officer Pu PC Lalngilneia leh Patent Information Centre-a Project Scientist Pu C.Laltlanzuala te'n zirlai kal khawmte hnenah zirtirna an pe a. Tualchher thiamna leh hmanraw siam chhuahte dan hmanga humhalh pawimawhna zir ho niin, Zopa tualchher thiamna hmanga Mizoram hmasawn theih dan tur leh mi dangte thiamna vawn him kawnga dan leh hrai hmanga hma lak theihna hrang hrang - patent, copyrights leh trademark chungchang sawi a ni bawk.