North Eastern Council (NEC) Plenary Meeting vawi 65-na chu May ni 26-27 khan Pinewood Hotel Convention Centre, Shilllong-ah neih a ni a. Vawiin khan Mizoram Governor Lt. General (Retd) Nirbhay Sharma chuan Mizoram leh hmarchhak state-te hmasawnna tura rawtna hrang hrang he Meeting-ah hian a thlen a ni.

Governor Lt. General (Retd) Nirbhay Sharma chuan India hmarchhak state-te chu India Act East Policy hlawhtlinna tura hmun pawimawh tak luahtu an nih avangin sawrkar laipui leh NEC tan ngaihpawimawh a tul thu leh NER Vision 2020 tihhlawhtlin thuai tha a tih thu sawiin NEC Guidelines thar chuan hemi kawnga nasa taka a puih a rin thu a sawi bawk. Hmarchhak state-te hian harsatna in ang tam tak an nei a, chu chu ngaihpawimawh ber a tul rualin state tinte harsatna ngaihthah palh erawh a hlauhawm hle tih sawiin Mizoram Governor chuan hmarchhak state-te hmasawnna tura rawtna pawimawh tak tak pali: in kalpawhna leh inbiakpawhna tha; ramri dep khuate hmasawnna tihchak; Skill development ngaihpawimawh; leh lirnghing vanga khuarel chhiatna laka in ven dan ngaihtuah; te a thlen a ni. Sawrkar laipui atanga hmarchhak state-te tana tanpuina sum, central scheme hrang hrangte leh 10% Gross Budgetary Support-te bakah hian tanpuina awm thei dangte ruahman belh ni thei se a ti bawk. NEC Meeting kum tina neih bakah half yearly emaw quarterly emaw tala neih a nih theih nan Mizoram Governor chuan rawtna a thlen bawk.

65th NEC Plenary Meeting ni hnihna hi Prime Minister-in a hmanpui a. Hmarchhaka hmasawnna hnathawh hrang hrangte hawnna neih niin heng zingah hian Bairabi leh Silchar inkar relkawng siam thar pawh a tel a ni. NEC Plenary Meeting-ah hian hmarchhak state hrang hrang Chief Minister leh Governor-te’n an state leh hmarchhak pum hmasawnna tura an rawtnate an thlen a ni.