Vawiin chawhnu dar 1 khan MSU Hqrs. Serchhip huaihawtin HSSLC Examination 2016-a Serchhip town chhunga Higher Secondary School Pathum atanga zirlai pass thate chawimawina hun buatsaih a ni a, he hun hi Pu H. Rohluna, Hon’ble Minister School Education chuan khuallian niin a hmanpui a, Pu MS Dawngkima, Addl. Superintendent of Police, Serchhip chu khualzahawm a ni.

Zirlai titha chawimawina inkhawm hi Laldingliana Chhangte, Vice President, MSU Hqrs., Serchhip chuan a kaihruai a, khuallian Education Minister chuan thusawiin, zirna hi a pawimawh a, ram hmasawnna bulpui ber a ni a ti. Zirna tihhmansawn nan sawrkar pawhin theihtawp a chhuah mek zel a, ramin hma sawn zel rualin thiamna pawh a thang zel a, kumin result thlirin hmabak tam tak kan nei niin a lang a, nikum result aiin tha zawk mahse tun aia ti tha thei kan ni a ti. Vawiina zirlai titha chawimawite pawh hi tun aia ti tha thei an ni a ti a, thiamna tak tak nei tura kan zir a ngai a, pass na tur ngawr ngawr ringawta zir hi a tawk tawh lo ani a ti.

Mizoram Board of School Education hian mark a ren tih sawi a awm thin a, tawng pawng mark ren a awm lova, a phute chuan mark sang tak an hmu thin a, an phu a nih chuan Full Mark pawh an pe hreh lo a ni tih hria a, exam leh turte pawhin nasa lehzuala tan la turin a fuih nghal bawk a ni.

Result tha nei turin nu leh pate pawhin mawhphurhna kan nei a ni ti a ti a, kan fate zirna kan ngaihsak tawk thin lo a hi a pawi a, a bikin sawrkar schoola sum seng lova fate kan luh tir avanga ngaihthat engemaw zat kan awm thin hi sawrkar school hnufumna a ni fo thin a ni a ti.

Zirna tha zawk a awm theih nan sawrkarin theihtawp a chhuak mek zelin, zirtirtu pawh training lo chu an awm tawh lo tluk a ni a, an traininga an zirte pawh naupang an zirtirna ah a taka hmang zel turin a duh thu a sawi. HSLC leh HSSLC exam hnuhnung ber atang khan exam bei thei tur selection test neih phal loh chu a takin hman a ni a, kumtluana beiseina sang tak nena an lo beih, harsatna engemaw an tawh avanga exam an bei thei lo thin hi a tha lova, School Result tha neih duh avanga zirlai chak lo zawkte exam phal loh te pawh hi thil tha lo tak a nih avangin hei hi tih chhunzawm phal a ni lo a ni a ti.

Tun School Session kal mek a tang hian HSLC-ah kalphung thar Integrated Evaluation Scheme (IES) chu hman tan tur a ni a, Internal mark ah mark 20 awmin, Board exam ah mark 80 a awm tawh dawn a, zirtirtu ten thuneihna sang tak an neih dawn avangin zirlaite pawhin tan an lak lehzual a tul hle a ni a ti.

Mizo ten zirlai harsa kan tih thin Science leh Mathematics ah kan harsatna sutkian nan sawrkar chuan sum harsa tak karah Mathematics zirtirtu atan mi 64 leh Science zirtirtu atan mi 48 lak thar turin ruahmanna a siam fel tawh a ni ti bawk.

Khualzahawm, Pu MS Dawngkima, Addl. Superintendent of Police pawhin thu sawiin chawimawi hian hlawhtlin zel duhna thinlung a siam a, vawiina chawimawina dawngtute pawh hian rah tha tak a chhuah ngei a beisei thu a sawi a, zirlaite hlawhtlinna atana fuihna thu tha tak a sawi bawk a ni.

Kumin HSSLC Examination-ah hian Serchhip Town chhunga Higher Secondary School 3 awm atanga zirlai tithate mi 25 hnenah chawimawi hi hlan a ni a, Govt. Higher Secondary School Serchhip atangin First Division-a pass mi 20, Lal Thanhawla Higher Secondary School atangin Distinction-a pass mi 2 leh First Division-a pass mi 1 leh Chhiahtlang Higher Secondary School atangin First Division-a pass mi 2 te hnenah chawimawi hi hlan a ni.

He hunah hian MSU Gen. Hqrs. atangin MSU hruaitute bakah Serchhip-a Higher Secondary School zirlai naupangte leh zirtirtute an tel a ni.